US para Chinese aro Malaysian Hackers ke botnam thishe

Washington: September 17, 2020. Wednesday din te US Justice Department para junaise ke, 5 jun Chinese nationals aro tuita (2) Malaysians ke charges korishe. Etu manuh khan para komti hoilebi 6 saal global hacking operations korikena identities, video game technology aro Hong Kong te kam kora chor kori thakishe. Tin jun Chinese suspects toh Chengdu 404, bahar te kam kori ase, etu Sichuan-based company ase aro tai khan para dosura business logot network security services offer kori. Tai khan para duniyaa laga hazar companies aro organizers khan laga computers hacked korikena khobor uthai loi, etu oper te poisa nemite hazar computers laga  identities te chor kori loi koishe. Tuita Chinese nationals toh boila te Chengdu 404 logot kam kori thakishe aro tuita(2) Malaysians para tangor gaming khan laga “gaming artifacts” chor korishe, etu oper te game laga chits aro credits chor korikena bekai koishe. Sob melaikena 7 jun toh cybersecurity experts para “APT41” hacking organization ase koikena thakishe. Konuba para bhapana te, etu group khan toh Chinese government para julai ase koishe. Hoilebi, court para file kora hesab te, ek ta Chengdu 404 hackers para 2012 saal te koishe ke, tai toh China laga Ministry of State Security para protect korikena koishe. “etu criminal actors ke besas ase ke PRC logot melikena hack aro chor koriboli free license thiase” koikena federal prosecutor Michael Sherwin para statement te janai thishe. Charges para hackers khan laga kam toh direct political logot melaikena ase kowah nai, hoilebi tai khan para India aro Vietnam te government laga computer systems te jabole parishe. Tai para aro koishe ke, 2018 saal te, Chengdu 404 para Hong Kong’s democracy te manuh khan samil thaka laga khobor toh collect korishe. Khobor toh keneka used korishe filings para thika nai koishe. Etu 7 jun manuh khan toh alag-alag charges te computer aro wire chor, poisa nemite aro racketeering te thurishe koishe. Pas(5) jun Chinese manuh ke toh besari ase aro tui(2) jun Malaysians ke Monday din Malaysia te thurishe koishe.