November 8, 2020. United States te Texas toh first desh hoishe ke coronavirus cases 1 million oper paikena ase. Etai duniyaa te US toh bemari cases sobse besi hoikena koishe. NBC khobor hesab te Friday din Texas desh te 1,000,589 cases paikena ase koishe. NBC khobor para aro koishe ke, jaa tui(2) hafta samai, Texas desh te bemari cases toh 40 percent te othishe aro manuh mora rate toh be 10 percent besi hoishe. Friday pujur dak te sob melaikena 18,977 morikena ase.
Governor Greg Abbott para May moina te lockdown thaka asani kora beche Texas te coronavirus bemari toh 94 percent hoishe aro manuh mora toh 91 percent te othikena ase koishe. Etu samai California toh Texas osor te ase, sob melaikena cases toh 960,361 hoikena ase koishe. Health officials para warn korishe ke, winter din te cases toh aro besi othibo, koikena CNN para khobor toh janaishe. Centers for Disease Control aro Prevention para Thursday din update kora hesab te United States te etu moina kotom howa samai coronavirus bemar para manuh mora toh 250,000 aro 266,000 neshina hoboli koishe. Sunday din United States te bemari cases toh 9,849,696 hoishe aro 237,017 manuh morikena ase, koikena Johns Hopkins University para janaishe.
Add Comment