Vicky Kaushal para IIFA 2024 host kora picheyte emotional post share kurisey

New Delhi, September 29 : Vicky Kaushal nimitey  Bollywood superstar Shah Rukh Khan logotey stage te khara kurikina, award event, IIFA 2024 host kora tu ekta sapna pura huwa laga moment thakisey. Aro etu ekta memory asey kuntu ke tai zindigibhor yaad kuribo. Vicky tu dhanyabad dibole mon thakikina, social media te ekta mon chuidiya laga note likhikina, Bollywood superstar Shah Rukh Khan ke tai kiman khusi pai etu jataisey. Tai para stage te Shah Rukh Khan logotey wakt bita laga picture bi post kurisey. Vicky Kaushal para etu picture share kurikina enaka likhisey, “Taikey stage te host aro perform kurikina magic create kora tu saikina dangor huwa para loikina juwa rati, tai logotey stage share kurikina etu magic laga hisa huwa taak…ami bisi sapna pura kuri loisey ! Thank you @iamsrk(Shah Rukh Khan laga instagram account) Sir. Apni nisna kun bi nai aro nahi kitya bi hobo paribo.” IIFA Award host kora laga alava, Vicky aro Shah Rukh Khan para bisi gana te dance perform bi kurisey. Taikhan duijun para ‘Pushpa: The Rise film’ laga gana Oo Antava te dance kurisey. Kuntu te Shah Rukh para Samantha Ruth Prabhu laga role kurisey aro Vicky para Allu Arjun laga. Vicky aro Shah Rukh Khan para ‘Bad Newz’ film laga Tauba Tauba gana te bi eksath dance kurisey. Taikhan duijun para etu event tu Vicky laga ‘Bad Newz’ film laga Mere Mehboob Mere Sanam gana laga dusra version te perform kurikina khotom kurisey. Etu rati(event laga rati) khotom huwa te, Shah Rukh Khan para Jawan nimitey Best Actor trophy paisey. Vicky bi juwa saal tai logotey Dunki Film te thakisey.