New Delhi, July 31: Vikrant Massey tu juwa saal 12th Fail te tailaga performance nimitey bisi dangor critical acclaim(film laga bari te opinion diya manu khan para bisi dangor tarif pa) picheyte desh te bisi mashoor hoijaisiley. Tai para Indian Express logotey kora ekta nutun interview te, etu film nimitey National Award laga charcha chuli thaka laga bari te koisey. Tai para koisey ki tai laga poila para iccha thakisey ki tai ekta actor hoikina desh laga President para etu National award pabo.
Interview te Vikrant para koisey, “Etu tu ekdam sapna nisna asey, hosa bi. Ami etu(President laga haat para national award pa laga) sapna kitya bi dikhanai koiley etu tu misa hobo. Ami poila para Rashtrapati Bhawan te khara kuribole laga sapna saisey. Amikhan laga desh laga President laga haath para award pa tu zindigibhor laga sapna thakisey. Hoilebi etu sapna tu etya pura huwanai.”
Tai para agey barikina koisey, “Ami manu khan para enaka support kora, online te baat-chit chuli thaka tu khusi pai asey. Manu khan ami ke support kuri asey. Hoilebi, matlab etu tu ekta sapna nisna asey. Ami etya ki kobo!”
12th Fail tu Vidhu Vinod Chopra para direct kora film asey. Etu film tu IPS officer Manoj Kumar Sharma aro IRS officer Shraddha Joshi laga asol jibon te banaisey. Vikrant para etu film te tailaga performance nimitey Filmfare Award for Best Actor(Critics) paisey. Etu film laga kamayi bi bisi bhal hoisey. India te etu film Rs 69 crore kamaisey.
Add Comment