Virat Kohli para BCCI laga family restriction rule logotey khsui napaikina thaka tu janaisey

New Delhi, March 16: Star India batter Virat Kohli para recently agey barikina BCCI (Board of Control for Cricket in India) laga cricket players khan para tour te thaka homoitey taikhan laga family logotey homoi bita te limit lagaidiya laga rule(nyom) logotey khusi napaikina thaka tu janaisey. Etu decision tu India team Border-Gavaskar Trophy 2024-25 te harija picheyte loisey. BCCI para koisey ki player khan laga baccha aro maiki khan tu etu 45 days laga tour te first dui hapta picheyte hey join kuribo paribo. Etu para khata homoi laga tour khan te toh, family khan players logotey ek-hapta taak hey homoi bitabo paribo. Etu rule laga  kotha koikina, India laga star batter Virat Kohli para agey barikina tailaga opinion disey ki etu rule ke bodli kuribo lagey aro ekta tough game picheyte players khan ke taikhan laga family logotey thakibole dibo lagey. Virat Kohli para RCB Innovational Lab Indian Sports Summit chulithaka homoitey enaka koisey, “Manu khan ke etu samjhabole bisi mushkil asey ki bahar te mushkil experience jhela picheyte family logotey wapas aha tu eman ekta mon aram aro comfort pa laga asey.” Tai para enaka bi koisey, “Amike nalagey ki manu khan toh etu (match picheyte family logotey wapas ja) kiman kimti asey etu buji asey. Aro etu ke loikina ami monduk mehsus kuriasey kilemaney etu toh enaka asey ki kun manu khan logotey ki chuliasey etu opor te control nai, taikhan opor te discussion kurikina enaka decision olai ki ‘oh, taikhan ke dur rakhibo lagey (family para) naki.” Ageybarikina, Kohli para koisey ki kun player bi ekta biya game picheyte tailaga room te ekla jaikina biya mood te thakibo; tai para suggest kurisey ki tai normal hobole mon asey aro ekta match picheyte tai tailaga normal zindigi te wapas ahibo paribo lagibo.