Virat Kohli, Rohit Sharma para Champions Trophy final te Yuvraj Singh laga world record bhangaidisey

New Delhi, March 09: ICC Champions Trophy 2025 nimitey stage tayar asey.  Indian team tu etu tournament laga final te Dubai International Cricket Stadium te New Zealand ke face kuribole asey. India aro New Zealand duita bi ek-dusra laga mukabala kuribole tayar hoithaka homoitey, Virat Kohli aro Rohit Sharma tu record bhangaikina headline te ahiasey. Etu janibole interesting asey ki Champions Trophy final 2025 tu Rohit aro Virat duijun nimitey bi ekta ICC event final te 9^th bar khela laga asey. Aro enaka kurikina taikhan duijun para bi etihas banaikina former Indian cricketer Yuvraj Singh laga world record bhangaisey, kun ekta ICC event laga final te sobsey bisi khela laga record banaisiley. Yuvraj para tailaga pura career te ICC finals te 8-bar khilisey. Aro etu saal laga ICC Champions Trophy final ke milaikina Rohit aro Virat tu etu te 9^th-bar khlisey. All-rounder star player Ravindra Jadeja bi Yuvraj Singh laga 8 appearance (matlab ICC final event te 8-bar khibole pa) te pungchikina tailogotey ekey somman hoisey.  India aro New Zealand laga majotey hobole thaka game laga bari te, India tu etu pura competition te bisi bhal khilisey. Captain Rohit Sharma para lead kora Indian team tu etu tournament te Bangladesh, Pakistan aro New Zealand logotey Group A te thakisey. India para bisi bhal khilikina taikhan laga group te thaka sob team ke haraidikina etu tournament laga 1^st semi-final te Australia laga agianst te khilisey, kuntu te arobi India jitisey. India logotey group A te thaka New Zealand tu Champions Trophy final hobole ageyte khali ekta game hey harisey. Aro etu game tu India laga against te khela wala game thakisey. Etu picheyte 2^nd semi-final te South Africa ke haraidikina aro ekbar Champions Trophy final te India laga against te khilisey.