Kohima, January 10: Havildar (Rtd) Dazo Angami (Sohuyi Sazo), 1969 Indo-Pakistan war laga experience war manu, Ashok Chakra Medal, Sangram Medal, Poorvi Star Medal aro 25th Indian Independence anniversary medal awardee toh January 9 direk morishe. Tai toh tai laga khor Phek district pethor laga Pfutsero, Rukizu jaga deh olob bemari para morishe. Tai toh 84 sal thaga ase aro tai toh tai laga ekta moda bacha, tinta maike bacha aro grandchildren khan logode thaki thaga ase.
Phusachodu village jaga deh war laga experience khelari toh 1934 sal johnom powah laga ase. Tai laga late Murhachu baba toh tai horu thaga time para morishe aro tai toh tai laga uncle late Pohu Sazo logode thakikena dangor howah laga ase.
Assam Police deh Late Hav. Dazo Angami toh Dergaon, Assam jaga laga constable karni 14 sal time para August 10, 1948 sal join howah laga ase. Etu bechide tai Assam Police chari kena Shillong jaga deh Assam Regiment karni 1958 sal recruit hoise. Tai logode first Sikkim Bn deh post dese aro etu bechide 1962 sal Assam Regiment laga 6th Bn deh transferred koridese.
1969 sal Indo-Pakistan war ola time deh, tai logode post toh frontier areas para East Pakistan (now Bangladesh) tak 1969 para 1972 sal tak dese. Tai Indo-Pakistan war deh hesha thakishe aro November para December 1971 tak forefront deh thakishe. War time deh tai logode post toh Halley, Lalmati, lsordy, Sylhet nesana alag-alag jaga deh dese.
Regiment deh active thaga bechide, tai 1974 sal Havildar laga rank para tai laga service retired hoise. Tai laga service time deh besi medals paikena thaga khan toh Ashok Chakra Medal, Sangram Medal, Poorvi Star Medal aro 25th Indian Independence anniversary medal ase.
Add Comment