WHO: coronavirus vaccine olai-lebe guarantee nai

September 24, 2020. Duniyaa te thaka manuh khan coronavirus vaccine olaboli roka samay aro etu para bemari toh hatabole besas thaka te, World Health Organisation (WHO) laga chief Tedros Adhanom Ghebreyesus para koishe ke, coronavirus vaccine bonai thaka toh toh bhal hobona nai guarantee koboli napare koishe. Press briefing thaka samay, WHO chief Tedros koishe, “vaccine bonai thaka toh kam koribo nai guarantee nai. Keman besi candidates khan para test koribo, eman bhal aro safe hoboli echa ase”, koishe. WHO laga hesab te, etai dak te 200 vaccines oper para Covid-19 vaccines clinical aro pre-clinical testing kori ase koishe. “vaccine bonai thaka history para kowah toh konuba para kamyab hobo aro konuba toh fail hobo”, koikena Ghebreyesus paa koishe. WHO aro global vaccine alliance group Gavi aro Coalition for Epidemic Preparedness Innovations (CEPI) melaikena COVAX scheme kolishe koishe. Tai khan mela laga aim toh Covid-19 vaccines bonaboli aro Duniyaa laga sob desh ekta hoikena kam koribo nemite ase koishe. COVAX Facility para government logot bemari spread kora toh rokaboli aro manuh khan ke jolti para vaccine babo nemite ase. COVAX Facility para bemari toh control te aniboli motob koribo, economy kerikena thaka toh uthabo aro vaccine bonai thaka toh melikena kam hobo, aro etu contest nahoi, koikena WHO laga chief para janai thishe. “sobse jolti para bemari ke hatabole aro Duniyaa laga economy aro uthabole toh desh sob te konuba manuh ke vaccine thibo lage, konuba desh te sob manuh ke nahoikena,” tai aro koishe.