WHO para hotai din COVID-19 cases otai khobor thishe

Washingtong: July 26, 2020. World Health Organization (WHO) para duniyaa te hotai din coronavirus cases otha khobor thishe. Hoilebi desh besi te lockdown measures tuh komti kuriboli kam kuriase. WHO para koishe ke, Friday din, 24 gonda pithor te 284,196 notun bemari cases paishe aro manuh mora tuh 9,753, thakishe, April 30 darik beche ek tin pithor te manuh mora tuh sob se besi ase koikena BBC para khobor koishe. July 18 darik te, WHO’s laga boila record break kurikena 259,848, notun cases paishe. World Health Organization hesab te, United States laga bemari cases tuh (69,641) hoikena ase aro Brazil te (67,860) cases ase. India (49,310) te cases ase aro South Africa te (13,104) cases ase. Health body para koishe ke, sobse besi manuh mora laga nuton cases tuh Peru te (3,876) thakishe, Brazil (1,284), United States te  (1,074), Mexico (790) aro India (740) morishe. Saturday din dak te, duniyaa laga sob melaikena coronavirus bemari caes tuh 15,746,452, te othishe aro manuh mora tuh 639,900 te ase koikena Johns Hopkins University para janai thishe. University’s Center for Systems Science and Engineering (CSSE) laga latest update hesab para koishe ke, Duniyaa pithor te United States tuh bemari cases aro manuh mora te be sobse besi ase, bemari cases tuh 4,112,651 paikena ase aro 145,546 manuh morikena ase. Brazil tuh second chaka te ase, tai khan bemari cases tuh  2,287,475 ase aro 85,238 manuh morishe.