Geneva: July 24, 2020. World Health Organization para coronavirus bemari tuh konuba desh te besi spread kora thiki ase koikena WHO laga Chief, Tedros Adhanom Ghebreyesus para Thursday din te koishe. “moi khan para chotu desh te bemar tuh besi spread hoikena jaa thiki ase,” koikena Chief para virtual briefing samay Geneva te koishe. “Two-thirds bemari cases tuh 10 desh para ase. Aro half cases report paikena thaka tuh tinta(3) desh para ase”. Thursday din dak te United States laga coronavirus cases tuh 4 million oper hoikena ase, average hesab te hoitai gondh pithor te notun case tuh 2,600 paiase, aro Duniyaa te etu sobse besi rate ase koikena Reuters laga tally para janai thise.
United States te, January 21 darik first cases thura beche benari tuh aro besi othiase. US te 1 million cases pongche-boli 98 din lakishe. Aro 2 milliom cases hobole 43 din lakishe aro etu bechete 3 million cases hobole 27 din lakishe. Hoilebi 4 million cases pongche-boli tuh 16 din he lakishe, ek(1) minute pithor te 43 notun cases paiase.
Tedros para aro koishe ke, manuh thaka chaka te cases tuh komti hoiase koikena tai khan ke ene tuh najari thiboli lage. “tui khan laga situation tuh janebo lage, tui khan thaka chaka te keman cases paishe jani? Tui khan etu khobor tuh kot para pabo jani? Tedros para sawal kurishe.
Add Comment