Working women deh ekta one day seminar lui shae, Kohima deh

November 28, 2024: Entrepreneur Associates para ‘Women working in unorganized sector in Nagaland’ deh ekta One day Seminar organize kuri shae, Kohima, State Academy Hall deh. Etu seminar tho 28^th November 2024 din deh lui shae.

Occasion deh, Governor, LA Ganesan para “Women Working in the Unorganized Sector in Nagaland: Challenges and Opportunities” laka topic deh kotha krui shae. Tai para mukan laka country lah socio-economic development deh maike kan dangor role kileh kuri shae, hoile b manu kan etu lah bishi kotha nakureh kui shae. Etu maike kan laka roles keh acknowledge kuri bo karne enaka role hui ase kui nah Governor para taial kushi janai di shae.

Unorganized sector deh kam kura maike kan pichae deh bishi duk pai nah kam kureh kui shae. Nagaland deh, maike kan etu sector deh bishi ase aro etu maike kan bishi dangor contributions kan banai, diverse aro essential tuita deh b. 2021 laka e-Shram portal report isap deh, Nagaland laka 8% population kan, informal sector deh kam kureh. Tateh atha laka upor tho maike kan ase. Etu maike kan khali contributors kan naho nah, kandan deh poisa kama maike kan ase. 

Governor para The Entrepreneur Associates keh tai laka kushi janai di shae, state laka entrepreneurship aro development deh taikan laka commitment dia karne. Kile koile taikan tho business trainings, environmental protection aro tress plantation deh awareness programs kan organize kuri nah ahi ase. Taikan nishi nah contributions kan tho ekta kara Nagaland aro inclusive India bana bole bishi zaruri ase.

Neikule Doulo, The Entrepreneur Associates laka Executive Director para bishi wak small-scale tradin kan tho maike kan para kui nah ase kui shae. Tai para etu maike kan financial service aro change kura time lokot deh kam kuri bole napara nishi nah challenges kan bishi face kureh kui shae. Local dukan malik kan para share kura kta recent challenge tho online shopping taki shae. Kinaka online shopping para small-scale business kan keh bia kuri di shae, 

Hoile b enaka challenges kan taki nah b maike kan quit nakureh aro taikan laka determination dikai takeh. Maike kan aha sal kan  deh organized sector keh dominate kuri taki bo. Etu karne mukan laka society kan agae jabo mun aji leh, etu maike kan keh lui jabo lakeh, Neikule Doule para kui shae.