World Bamboo Day 2024: Next Generation bamboo loishey

September 18, 2024, 05:00 PM: “Next Generation Bamboo: Solution, Innovation and Design” laga theme under tey, ekta World Bamboo Day organize kurishey, Nagaland Bamboo Development Agency para, 18^th September, 2024 tey, itu Nagaland Bamboo Resource Centre, 6th Mile, Sovima tey para, Chümoukedima under tey. Special Guest, NBDA laga Chairman – Nuzota Swuro para itu world Bamboo day Flag hoist kurishey, official khan laga samney tey para. Itu occasion tey kotha kuri kena, Swuro para highlight kurishey ki, Nagaland Bamboo Development Agency toh hoiley 2004 saal tey launch kurishey, 15^th March tey, kuntu toh hoiley itya tak tey 20 saal complete kurishey itya tak thaki kena. Tai para koishey ki, itu alag district khan toh bishi bhak toh hilly area khan asey aru terrain khan bishi danger bhi asey, itu nimitey raw material khan alag alag jaga khan tey bikri kuriboley transport kuriboley ekta dangor challenge asey, kiley koiley transport ke hire kuriboley laga poisa toh bishi charge kurey, market rate para bhi bishi, kuntu para toh profit toh nil thakey, nahoiley loss bhi hoishey, farmers khan karney. Tai para itu bhi highlight kurishey ki, NBDA para toh hoiley 46 local para ulawa laga bamboo species khan chiniboley parishey aru tai khan lab test aru analysis kuriboley nimtiey research kuriboley plan kuri asey koishey. Itu toh hoiley scientific data offer kuriboley asey, moi khan ke local para ulawa laga bamboo khan chulaboley karney, artisan khan toh raw material toh tai khan laga resource hisap tey extract kuriboley paribo. Itu program toh hoiley NCS Mission, Director, NBDA, Elbert Ezung para wecome address di kena shuru kurishey; TRIUM ΑΝΙΜΑ para special ganna kurishey; NBDA laga Team member – Dr. Likhase Sangta para vote of thanks dishey.