Astana, 3 July : India laga boxing team Astana 2025 World Boxing Cup te bhi dangor performance continue korise, jimanah Minakshi (48kg) aru Pooja Rani (80kg) Day 3 te India ke duta medal guarantee korai dise bhal performance diya karone.
Minakshi prothom te apuni laga naam uthi disey, jimanah Chinese Taipei laga Guo Yi-Xuan ke quarterfinal match te ekdom dominate kori 5:0 unanimous decision te jitise. Tai laga sharp footwork, precise punching aru ring awareness dekhi judges khan pura sure hoise. Tai match laga tempo control kori, dur para clean punch marise, aru semifinal te jagah pakorise — kom se kom ekta bronze medal confirm kori.
Dusra te, India laga ekjon sabse experienced boxer Pooja Rani 80kg category te Kazakhstan laga local favourite Gulsaya Yerzhan upor grit aru determination dekhaise. Tai laga quarterfinal match ekdom tough thakise, kintu Pooja aggression aru control milaikeh kheli, 4:1 split decision te jiti jaisey.
Ita match te Pooja starting round te pressure absorb kori, last rounds te bhal punch mari judges ke impress kori disey. Tai bhi semifinal te uthi jaisey aru podium finish secure kori luisey — ahibo laga match te tai gold target koribo.
Ekta din laga agey, Anamika (51kg) India laga performance te aur boost dise, Turkey laga Aysen Taskin ke quarterfinal te ja bole outbox kori disey. Tai laga calm aru tactical performance India laga hopes ke alag weight category te bhi alive rakhi disey.
Add Comment