Hangzhou, 22 December : World No. 1 An Se-young Sunday din te BWF World Tour Finals 2025 jiti loise, juntu te tai Wang Zhi Yi ke 21-13, 18-21, 21-10 score te harai dise. Itu logot, ekta season te USD 1 million pora besi prize money jita laga first badminton player bhi tai hoi dise.
BWF World Tour Finals 2025 age te Se-young already USD 763,175 jitise, aru finals jita laga USD 240,000 cheque pai kene tai total prize money USD 1 million cross kori dise.
Final match tu bohut close ase. Prothom game te Se-young 21-13 te jitise, kintu next game te Zhi Yi strong comeback kori 18-21 te jitise. Pichla saal itu same tournament laga semifinals te Se-young, Zhi Yi pora harise.
Kintu itu bar, South Korean player tu history repeat hobo diya nai. Tai last game te dominating performance di 21-10 te jitise aru itu logot tai laga second World Tour title secure kori loise. Itu laga age tai matro ekta World Tour title ase, jun 2021 te ahise.
Itu tai laga ei saal laga 11-number singles title ase, jun logot tai season te joint-most successful player hoi dise, Japanese legend Kento Momota logot tie korise.
Add Comment