New Delhi, 20 September : Young Suraj Vashishth senior World Championships debut te bhal performance dikhai dise, 60kg te quarterfinal ulaikene jai se, kintu haria karone bahar hoise. Dusra Greco-Roman wrestlers khan scoring move koribo struggle kori thaka time te, U20 World Championships bronze winner aru U20 Asian champion Suraj duita bout jiti loise, jun coaching staff khan karone ekta cheer hobo nisena hoise.
Suraj prothom match te Angel Tellez ke 3-1 para haraise aru itu pichete Moldova laga Victor Ciobanu ke bhi 3-1 para haraise. Kintu quarterfinal te Serbia laga Georgij Tibilov logot 1-4 para hari jaise.
19 saal laga Rohtak para Suraj, itu saal July te Bishkek te U20 Asian title jitina India laga 6 saal laga wait khotom kori dise gold karone international level te. Senior level te bishi experience aru exposure pabo tai aru improve koribo lagi ase. Already tai senior level te Mongolia Open te ekta silver aru Yasar Dogu te ekta bronze jeetise.
72kg te khelua Ankit Gulia qualification bout te Korean Yeonghun Noh logot 0-9 para technical superiority te hari jaise. Itu pichete quarterfinal te hara pora Ankit bhi out hoise.
97kg te Nitesh prothom match te Croatia laga Filip Smetko logot tight 3-2 para jitise, kintu pre-quarterfinals te Iran laga world No.1 Mohammadhadi Saravi logot 0-4 para hari jaise. Tai repechage round te agey jaise.
Aman 77kg repechage round te Ukraine laga Ihor Bychkov logot 0-10 para technical superiority te haraise.
India laga ekla medal itu championships te Antim Panghal para ahi ase, jun Thursday te women’s 53kg te bronze medal jeetise.
Add Comment