Lotha Football Championship (LFC) 2025 tu 22 January 2025 te Wokha laga local ground te khotom hoisey. Etu event te SDPDB Bhandari laga MLA aro Chairman Achumbemo Kikon special guest thakisey.
Etu khata closing ceremony te kotha kurikina, Kikon para wapas dohraisey ki etu community laga soch aro action tu society agey baribole aro advance hobole nimitey jaruri asey. Tai para etu match sa manu khan ke civilized hoikina players khan ke field te gusa na-uthikina bhal para perform kuribole nimitey hosla barabole challenge disey. Tai para jor dikina koisey ki players khan laga performance tu match sa manu khan opor te bi depend korey aro players khan ke spotsman laga bhal khubi dikhabole request kurisey.
Kikon para match sa manu khan ke public jaga jaiseki government office aro playground khan ke nijor laga ghor asey nisna safa rakhibole nijor ke challenge kurikina ekta nutun soch aro tarika apnabole koisey etu nutun saal para suru kurikina. Tailaga hisap te, etu para society laga mentality dikhai.
Kikon para etu district te development aro infrastructure ke loikina khusi nathaka tu janaikina koisey ki development nuhuwa laga asol karon tu mati nimitey jhagra huwa aro jhamila ola tu asey. Tai para manu khan ke dusra logotey adjust kora laga bhabna logotey development ke ekta khusi mon aro positive approach para embrace kurikina state government laga mehnat ke bujidibole request kurisey. Tai para jor dikina koisey ki Chief Minister Neiphiu Rio laga leadership under te, etu rajya tu sports talent ke promote kuribole focus kuriasey. Aro judi matimalik khan para aro development te badha na-anisey koiley etu para infrastructure banabole modod kuribo.
Tai para audience ke yaad dilaisey ki Wokha district laga 4-jun MLA tu ek-dusra logotey milikina asey aro community laga development nimitey kaam kuribole bisi mon asey.
Picheyte, tai para sports khela manu khan ke drugs, mudu, mobile aro biya bustu khan para dur thakikina taikhan laga talent te focus kuribole koisey. Tai para taikhan ke khusi kuridiya, gao bhal rakha aro career opportunity diya kaam khan te focus kuribole encourage kurisey. Tai para jawan Lotha aro Naga manu khan ke sports ke serious loikina etu ke ekta career hisap te khedabole koisey. Tai para organizer khan ke dhanyabad disey aro best team ke biya hatsa nohoikina jitibole wish kurisey.
Last match tu etu khata closing ceremony picheyte suru hoisey. Kuntu te XI Brothers laga Mhabemo Kikon para game suru hoikina 6 minute bhitor te ekta goal maridisey. Aro 9 minute te Nitsyan FC laga Nchum Murry para ekta goal marikina point tu equal kuridisiley.
Etu Match laga first halt te XI Brothers aro Nitsyan FC duita para bi bisi jordar para khilikina 45 minute picheyte 1-1 draw te khotom kurisey. Second half te defending champion XI Brothers para tagra attack kurisey. Aro etu team laga player Toka tu 79th minute te ekta goal marisey. Substitute player Wonrhon kun para 60th minute te Benri ke replace kurisiley tai para 81st aro 90+ minute te XI Brothers nimitey duita goal score kurikina, etu match tu 4-1 score te jitisey.
Add Comment