DIMAPUR, SEPTEMBER 27 : Deputy Chief Minister & Home & National Highways Minister Nagaland, Y. Patton pora notun Forensic Science Laboratory (FSL) Building toh Kachari Gaon, Dimapur te kam julabole nemite suru kuribole kholidese. Etubi 27th September 2018 te.
Etu din te manu kan chama kura ke kotha kurikena Y Patton pora etu FSL toh ki-ki chamala nemite kotha mana time te ekdam kam hua laga chis ase. Aro etu porahi husa kotha ulaidebole baribo. Aro etu husa kotha kan etu FSL pora ulaidiya toh Court te luijai kena dekhaidebole bi bari koi kena janaide thakise. Tai bi etu nesena FSL te pora kam julabole kura toh jana manu aro dimak thaka manu porahi bhal te sabole bari. Aro etu FSL pora eku diktar nakurikena husa kotha ulaidiya laga ase koi kena janaise.
Tai bi ami kan neju manu kan ki-ki chamala nemite sabole karne tusera jaka te jai. Aro chamala kan nemite saidebole besi time lui thaki. Etu karne tai Police Department kan ke notun Division etu chamala saidebole karne ulabole kuribi. Etubi State Forensic Department laga majutte. Kele etu porahi chamala nemite saidebole kura toh deri nahobo aro ami kan tehi bhal hua huijabo koi kena. Tai bi etu FSL laga Lie Detector toh husa kebi kam julibole bara karne besi khushi baa kotha janaide thakise koise.
Etu din te kotha kurikena tai bi ki-ki chamala nemite sabole kura Officers kan ami kan state sob jaka laga kan ke bhal te ki-ki shekaidebole kuribi. Aro FSL nemite sabole thaka Officers kan kebi bhal te ki-ki shekaidebole kuribi koi kena janaise. Tai bi Dimapur laga FSL pora bhal te kam julai kena chamala kan nemite thik time te saidebole kuribo bari koi kena janaide thakise.
Etu din te kotha kurikena IGP (NAP) Wetsope Krome IPS aro DGP Nagaland, T J Longkumer, IPS 2 jun pora bi etu FSL ulaidiya karne besi khushi baa janaise. Aro etu pora ami kan neju manu kan nemite besi bhal hobole laga ase koi kena janaide thakise koise.
Etu din te bi Executive Engineer, Cmd. Division, H. Vihokhe porabi etu FSL Building laga Technical Report janaidese. Youth Wing, Dimapur Police Baptist Church laga pora Special gaana kuridese. Pastor, PBC Dimapur, Rev. Rakhu pora Isor laga bhal kotha janaidese. Aro Deputy SP, FSL Nagaland, Pfokreni Chalai pora toh Vote of Thanks kuridese koise. Aro etu din te Minister PHED, Jacob Zhimoni, Advisors Tovihoto aro Dr. Longriniken, CP aro FSL office Dimapur laga officials kan, ADC Dimapur, Albert Ezung, Village functionaries kan Kachari Gaon laga aro Senjum bosti aro tusera kan ahe kena thakise koise.
Add Comment