Zayn Malik para food poisioning huwa picheyte Mexico City show cancel kuridisey

Los Angeles, March 30: Zayn Malik laga  fan khan para tailaga Stairway to the Sky Tour laga ekta final show sabole bisi mon thakisey. Holebi, Zayn tu food poisioning huwa picheyte etu show cancel kuribole lagisey. Tai para etu show suru hobole olop ghonta ageyte hey tailaga instagarm story te announce kurisey ki tai etu show cancel kuribole lagisey. Instagram Story te Zayn para enaka likhisey, “Ami mondukh para etu koi asey ki ami aji Mexico te perform kuribole naparibo. Ami aji phujur para ekdam gao bhal nalagikina asey aro joborjosti kuribole kosis kora picheyte bi amilaga gao para naparikina asey. Apnikhan ke mondukh kuridiya nimitey maaf kuridibi. Ami para amilaga fans khan laga side para hodai morom aro energy mehsus kora tu ami nimitey bisi dangor kotha asey aro apnikhan logotey etu moment miss kuridiya nimitey ami bisi monduk asey. Bujidiya nimitey dhanyabad aro morom para etu janibi ki ami para apnikhan sob ke amilaga pura morom pathai asey.” Olop ghonta picheyte Zay para tailaga gao laga update share kurikina enaka likhisey, “Mexico, ami aro amilaga team ke bisi biya para food poisioning hoisey koilebi ami apni khan ke morom korey…Etu tu dhamali laga kotha nohoi, amikhan etya tak bi dukh paiasey. Amilaga fan khan amikey maaf kuridibi. Etu show khan para amikey zinda, khusi, dhanyabad aro ghor te thaka nisna feel kuribole disey. Etu show khan, apnikhan laga energy, apnikhan laga fan project khan para amikey eman morom aro enaka feeling para bhorta kuridsey ki ami kobole bi naparikina asey.” March 25 te jitya Zayn Malik para Mexico city laga Palacio de los Deportes te perform kurisey, internet tu ekdam khusi hoijaisey. Tailaga opening gana tu tailaga poila laga One Direction band laga popular gana ‘Night Changes’ thakisey.