Ukraine laga President Volodymyr Zelenskyy para koisey ki United States laga support laga bina Ukraine logotey Russial laga julum para bachibole chance komti asey. US President Donald Trump para Russian President Vladimir Putin logotey ekta phone call kora picheyte announce kurisey ki Ukraine-Russia majotey war khotom kuridibole laga baat-chit suru hobo.
Zelenskyy para NBC News logotey kora ekta interview te enaka koisey, “Etu tu bisi bisi bisi mushkil hobo parey. Aro hoi, sob mushkil situation te apni logotey ekta chance asey. Hoilebi amikhan logotey chance komti hobo- United States laga support laga bina bachibole laga chance komti asey.”
NBC News para Sunday din te etu interview TV te dikhabole ageute release huwa ekta khata video te Zelensky para enaka koisey, “Ami etu bhabna kuribole mon nai ki amikhan(US aro Ukraine) ekta strategic partner nohobo.”
Zelensky para etu bi behes kurisey ki Putin tu war khotom kuribole nohoikina ekta temporaray ceasefire te hey interested asey kuntu para sanction hataidikina, Russia laga military ke aro ekbar eksath anikina organize kuribole moka dibo.
Tai para Ukraine tu US military support laga bina taikhan laga military takat kamjor hoijabo aro Russia para hamla kora laga khatra te thakibo koikina chinta jataisey.
Trump para Wednesday din te tai para Putin aro Zelenskyy logotey alag alag phone call kurikina war laga bari te discuss kurisey koikina announce kora picheyte, tai para US logotey milikina tahka desh ke asurit kuridisey aro Ukraine nimitey US Support laga status quo ke change kuridisey.
US foreign policy te bodli an ate, Trump para koisey ki tai Ukraine-Russia laga larayi olop homoi karney rokhaidibole nimitey duita side para bi baat-chit suru kuridibole karney Putin ke joldi lok kuribole asey.
Add Comment