New Delhi, May 5 : Vidhu Vinod Chopra laga ‘1942 A Love Story’ tu Anil Kapoor laga sobsey yaadgar movie majotey ekta asey. Etu film ke etu laga ekdam bhal music nimitey bi yaad korey. Hoilebi etu film nimitey Anil Kapoor first choice thakanai. Filmmaker Vidhu Vinod Chopra para etu film Shah Rukh Khan ke first offer kurisiley.
Etu filmmaker para etu kotha tu olop din ageyte Kellog School of Management te reveal kurisiley.
Tai para koisey, “Shah Rukh laga amilogotey ekta history thakisey. Jitya ami 1942 : A Love Story banai thakisey, ami para tailaga kaam dikhikina thakisey. Renu(tailaga utu homoitey thaka maiki) para Maya Memsaab koikina ekta film edit kurisiley. Aro etu te Shah Rukh Khan para ekta chutu role kurisiley. Etu nimitey ami para ‘1942: A Love Story’ film te taikey main role offer kurisiley. Taikey enaka role offer kora ami first manu thakisey. Utu homoitey tai ekta star thakanai.”
Last te, Vinod tu agey barikina etu film nimitey Anil Kapoor ke sign kurisey. Aro ekta jnakari tu etu asey ki first te Manisha Koirala laga part tu Madhuri Dixit ke offer kurisiley. Anil Kapoor aro Madhuri tu ‘Tezaab’ aro ‘Parinda’ nisna film khan te already ekta hit jori hoikina thakisey.
Vinod para Shah Rukh Khan ke bisi saal picheyte ‘Munnabhai MBBS’ film bi offer kurisiley.
Hoilebi tai ekta surgery nimitey etu film para olaijabole lagisey. Vinod para koisey, “Ami para Shah Rukh ke koisey apni jabi, 6 moina, ek saal aro kiman homoi hoilebi lobi. Hoilebi jitya apni wapas ahibo, apni sobsey first amilaga film kuribo. Kiba problem nimitey, tai etu film koranai. Toh amipara koisey etu nimitey Sanjay Dutt right choice asey.”
Add Comment