Nagaland te health care laga crisis

Nagaland ekta beautiful state ase—culture, nature aru community logot full—kintu health sector te etya bhi dangor problem face kori thaki ase. State te bishi bar public meeting, policy aru scheme announce kora hoi, kintu ground level te health care system bisi weak ase. Etu problem infrastructure aur budget khali nahoi, manu laga life, respect aru health rights logot jura thaka ekta serious matter ase. Nagaland laga maximum government hospital khan—PHC (Primary Health Centre), CHC (Community Health Centre) aru district hospital—bisi jagate properly kaam na kore. Doctor nai, medicine nai, equipment bhi nai. Alak alak jagah te, patient khan ke treatment karone Assam, Kolkata nisena bahar jagate jabo lage. Emergency time te, etu journey bishi risky aru sometimes fatal bhi hoi jai. Ekta major reason ase qualified medical staff na thaka. Young doctor khan mostly cities te job search kore, rural posting avoid kore. Infrastructure bhal na thake, incentive nai, security problem thaka karone bhi rural jagate kaam koribo karone mon nai. Specialists—gynecologist, paediatrician, anaesthetist khan bhi shortage te ase. Juntu manu khan ke bishi effect kori ase. Dusra dangor problem hoise government schemes implement properly nahoi. Ayushman Bharat aru National Health Mission nishena bhal scheme ase, kintu Nagaland te olop jagate he benefit reach kori ase. Corruption, mismanagement, aru monitoring na thaka karone fund misuse hoi thake. Juntu poor family aru remote village te thaka manu ke help koribole pare , olop bhi help na pai. Health education aru awareness na thaka bhi etu problem ke barhai ase. TB, malaria, hepatitis, diabetes nishena preventable disease khan aji kali bhi spread kori thake. Mental health opor bhi log thaka taboo aur lack of services karone bisi manu silently suffer kore. Depression, anxiety aru drug abuse problem bishi ase, kintu professional help na thaka karone eku treatment na pai thake. COVID-19 pandemic time te sob weakness expose hoi jaise. Hospital khan overload hoi jaise, equipment nai, ICU bed nai, oxygen shortage hoise. Government kunba step loise—awareness campaign, isolation ward banaise—but long-term solution na ahibo, etu bhi clear ase. Ki koribo lage? First te, government ke health sector ke top priority banabo lage. Medical college, nursing institute, aru technician training improve koribo lage. Equipment upgrade koribo lage, hospital khan modernize koribo lage. Dusra, fund misuse kura bondh koribo karone strict monitoring system introduce koribo lage. Transparent system thakile, corruption aru delay automatic kom hoijabo. Third, public private partnership promote koribo lage. Nagaland te private hospital bhi ase— etu logot collaborate korile service improve hobo pare. Remote area te mobile medical unit aru telemedicine introduce kora bhal hobo. Last, awareness campaign barhabo lage. Hygiene, vaccination, safe sex, mental health aru drug abuse logot related education sob jagah te spread koribo lage. NGO, church aru civil society khan ke actively include koribo lage. Nagaland te health care khali Dimapur aru Kohima te he thakile nahobo. Mon, Kiphire, Noklak nishena jagate bhi same right thakibo lage. Health ekta luxury nahoi—etu ekta basic human right ase. Etu crisis ke ignore korile, next generation sob hardship face koribo. Action lobole time aji ase.