BWF World Junior Championships: India semifinals te ulai jaishey

Guwahati, 11 October : India laga dangor performance Yonex-Sunrise BWF World Junior Mixed Team Championships te aji khotom hoise, karon team ekta strong Indonesian side logot semi-final te hari jaise Guwahati te.

India team, juntu Thursday te former champion Korea ke harai kene mixed-team competition te first time medal jiti thakise, itu bar 35-45, 21-45 te hari jaise pre-tournament favourite Indonesia logot.

India team Wednesday te Korea ke harai thaka squad te ekta change kori thakise — mixed doubles te Aanya Bisht laga jagate Vishakha Toppo ke loi kene, aru match start hoise boys doubles category pora.

India laga top doubles pair Bhargav Ram Arigela aru Viswa Tej Gobburu bhal shuru di thakise, juntu Indonesia laga Muhmmad Rizki Mubarrok aru Raihan Daffa Pramono ke 9-5 te harai dise, aru India taraf pora upset laga asha uthi jaise.

Unnati Hooda laga game girls singles te Thalita Wiryawan logot bhal na thakilebi, first set te India ke 18-16 te olob advantage te rakhi loise. Kintu Indonesia laga world junior no.1 boys singles player Mohd Ubaidillah nijor team ke wapas advantage di dise kitia tai Rounak Chouhan ke 11-5 te harai dise, aru Indonesia ke 4-point advantage di dise.

Mixed doubles te Lalramsanga aru Vishakha Toppo thora fightback try kori thakise, aru score 28-28 aru 9-3 tak barabor loijai thakise. Kintu Indonesia laga Ikhsan Pramudya aru Rinjani Nastine break pora nijor level uthi loise 10-9 te match close kori loise, aru wapas nijor side te advantage loi loise.

Itu pichete Rinjani Nastine Riska Anggraini logot pair hoi kene India laga Reshika U aru Vennala K ke 9-2 te harai dise, aru first set 45-35 te complete hoi jaise.

Confidence uthi ja pora Indonesia second set te full control loi loi jaise suru pora — Mubarrok aru Pramono India laga boys doubles ke 9-2 te harai dise.

Unnati Hooda 7-9 te Wiryawan logot aru Rounak 7-9 te Ubaidillah logot hari ja pora, itu India laga doubles combination ke gap cover koribole bohut mushkil banai dise.

Indonesia etiya final te China logot khelibo Saturday te. China dusra semi-final te Japan ke 2-1 te harai dise.