AGARTALA | January 19: Tripura police laga Mobile Task Force (MTF) pora jowa saal state te pora 2,245 illegal immigrants thorise, ekjun senior police officer pora Friday te koise.
“Moi khan pora jowa saal Tripura te 2,245 illegal immigrants thorise, tate 2,058 toh moda aro 187 toh maiki thakise. Besi bhak illegal migrants khan toh samne laga desh, Bangladesh pora ase,” etu officer pora koise.
Tai koise ki state te MTF laga saathta detention camps ase aro illegal migrants khan toh nijor laga desh te wapas nakora samoy majote camps te rakhiye.
“Sob milai kena 2,127 Bangladeshis toh jowa saal wapas botha dise,” etu officer pora koise.
Tripura toh Bangladesh logote 856-km lamba border ase.
“Besi Bangladeshis khan Indian laga maati te treatment karne, saati karne nahoile aalag kam karne passport nathoriye kena ahiye. Aro tate konoba immigrant haadiyar nahoile bondh kora bostu bokhi kena thakile, moi khan pora tai khan laga khilaf case register koriye aro kanun laga hisab pora sajai dibo karne court te loi jai. Konoba enika galdi kam pora nathoriya khan ke toh sitha wapas bothai diye,” etu officer pora koise.
Tai pora koise ki jowa saal te MTF laga sobse dangor kam koriya toh june te 25 Bangladeshi manu khan ke Agartala Railway station pora thorise.
Tai khan toh etiya Bishalgarh central jail te ase. Tai khan logote khilaf case ase ki tai khan toh Pakistan laga ISI logote milajula ase, etu officer pora enika koise.
Add Comment