Lumami, October 23 – Nagaland University, Lumami te Department of Zoology para 23rd October 2025 te ekta Cancer Research Laboratory laga inaugural ceremony aru ek din workshop hold kurishe. Etu event University laga scientific advancement aru region te barhi thaka cancer burden ke address kuribole commitment laga ekta important milestone mark kurishe.
Chief Guest hisap te Prof. Jagadish Kumar Patnaik, Vice-Chancellor of Nagaland University attend kurishe, aru Dr. Abemo, Registrar of Nagaland University Guest of Honour thakishe. Programme toh chair kurishe Dr. Ramita Sougrakpam, Assistant Professor, Department of Zoology.
Inaugural session toh ribbon-cutting ceremony logote shuru hoishe, juntu piche te new laboratory inspection bhi kurishe. Chief Guest ke lab laga facility aru available equipment khan bisare te brief inform kurishe.
Welcome address te Prof. Bendang Ao koishe ki Nagaland te cancer case barhi thaka karone, cancer research te focus kuribole ekta urgent need ase — especially gastrointestinal cancer te. Tai tai laga personal experience share kurise aru koishe ki etu disease toh family aru community duita te deep impact rakhi ase. Prof. Bendang Ao, Prof. Ranjit Kumar ke appreciate kurishe etu Cancer Research Lab laga idea conceptulize kuribole karone aru University administration aru engineering team ke bhi thankful hoishe support di thaka karone. Tai express kurishe ki Nagaland University future te cancer research te ekta centre of excellence banibo paribo.
Prof. Ranjit Kumar tai laga address te mention kurishe ki Indian Council of Medical Research (ICMR) laga data hisap te Nagaland India te first ase nasopharyngeal cancer te aru second ase oral cancer te, aru oesophageal aru colon cancer bhi beshi case ase. Tai koishe ki report na thaka case bhi ase, tai actual number bhi beshi hobop pare. Tai student khan ke encourage kurishe etu field te research pursue kuribole aru koishe ki cancer research toh local level para start hobo lage. New laboratory toh cancer cell line study aru possible medicine develop kuribole help kuribo, juntu te department laga animal house aru resource use kuribo pare.
Guest of Honour, Dr. Abemo tai laga speech te God ke thanks dishe etu Cancer Research Lab successful launch kuribole di thaka karone. Tai Vice-Chancellor laga scientific innovation promote kuribole vision ke appreciate kurishe. Tai thora humorous remark te science laga evolution mention kurishe, koishe ki scientific progress toh humanity karone important ase. Tai encourage kuri ase department aru healthcare facility khan milikina work kuribole — ekta cancer-free society banabole. Tai mention kurishe ki Nagaland University te cancer prevention aru cure karone bishi potential ase. Chief Guest, Prof. Jagadish Kumar Patnaik tai laga address te personal experience share kurishe, koishe ki cancer tai laga family te bishi effect kurishe — tai laga relative khan ke disease karone harai dishe. Tai reaffirm kurishe ki Nagaland University te scientific research aru innovation ke aage loi jabole tai commitment ase. Tai faculty aru student khan ke encourage kurishe research aru publication te excellence pursue kuribole. Tai bhi koishe ki local healer khan (kobiraz) logote milikina traditional healing practice document kuribole aru possible natural remedy identify kuribole lage — aru eneka indigenous knowledge ke recognize aru patent bhi kuribo pare. Prof. Patnaik koishe ki tai laga emotional connection Nagaland logote thake, aru tai future te bhi University laga scientific initiative ke support kuribo.
Programme toh Vote of Thanks logote close hoishe, juntu Mr. Pukhrambam Rajesh Singh, Assistant Professor, Department of Zoology para deliver kurishe. Tai sob dignitary, faculty member aru participant khan ke thanks dishe event ke successful banai thaka karone. Ongaroni Ngullie, research scholar, Department of Zoology para rapporteur thakishe.
Add Comment