Srinagar, November 8 – Ekta dangor khobor ahi she Jammu aru Kashmir para, juntu police laga investigation te ekta AK-47 rifle paishe ekta doctor laga locker te Government Medical College (GMC) Anantnag te.
Police report hisap te, suspect doctor laga naam ase Dr. Adeel Ahmad Rather, putra Abdul Majeed Rather, juntu Qazigund, Anantnag para ase. Tai GMC Anantnag te Senior Resident Doctor hisap te October 24, 2024 tak kaam kuri thaka ase. Police, information paishe pichete, medical college te search operation chulai kina, rifle toh paishe Dr. Rather laga locker bhitor te.
Rifle pa pichete, Srinagar Police Joint Interrogation Centre (JIC) Anantnag laga help loi kina suspect ke detain kuri she. Case toh register kuri she Arms Act Section 7/25 aru Unlawful Activities (Prevention) Act (UAPA) laga Section 13, 28, 38, aru 39 under te.
Police official khan kobor dishe ki investigation toh shuru stage te ase, aru taikhan try kuri ase janibole ki bhabhe rifle toh college bhitor ahishe aru etu kunba militant network nah illegal activity logote connect ase naki. Ekta military-grade weapon ekta government medical institution bhitor paishe, etu security aru monitoring system upor dangor question uthai dishe.
Police khan CCTV footage check kuri ase aru staff member khan ke bhi questioning kuri ase suspect logote aru kunba link ase naki bujhibole.
Authorities khan sensitive nature karone detail sob public ke disclose nakure, kintu etu incident te pura region te tension aru shock create kuri dishe. Public khan demand kuri ase jate future te ajiya security breach nahobole, aru public institution te strict checking thakibole.
Add Comment