Dimapur, Nagaland:Livingstone Foundation Higher Secondary school, Dimapur te dui din Philatielic Exibition manaishe. Etu event toh 24th aro 25th January 2019 te manaishe.
Etu event laga mukhy(main) kotha khan toh philatelic collections laga exhibition, WW-I Naga Labor Corps. laga 100 years commemoration laga special first din laga cover release, aro All Nagaland Private Schools Association (ANAPSA) laga Silver Jubilee thakishe. Etu event te Stamp design competition bhi thakishe.
Shri Lalramzauva, Superintendent Posts, Nagaland para sob manu ke ekdam bhal para welcome kurishe. Livingstone Foundation Higher Secondary school para etu event te special song present kurishe. WW-I laga Sumi Naga Labor Association laga convener Dr. H. Hotokhu Chishi para kunba khas(important) delegates khan ke Souvenirs dishe. Tai laga speech te Dr. H. Hotokhu Chishi para Naga Labor Corps. khan opor te kotha koishe. Tai koishe Indian government aro state government para Naga Labor Corps. khan ke bhal para sanai aro tai khan ke sabole hesab kora nai.
Labor Corps. te halibole alak alak Nagaland laga jati para 2000 Nagas ke pothaishe. Etu manu khan majote 1000 Sumi, Naga; 400 Lotha, Naga; 200 Rengma, Naga aro 200 Ao, Naga; aro dusra Naga jati khan para 200 genika manu khan Labor Corps. te pothaishe. Politically, WW-I toh Nagas khan nimite suku khula laga samay thakishe. Naga Labor Corps. laga khandan manu khan bhi etu programme te ahishe. Pura-puri 58 Naga Labor Corps. laga khandan manu khan programme te ahishe.
Dr. Chishi koishe Govt. of India para Naga Corps. nimite eku bhi kura nai. Etu toh Indian government laga side para etu kotha opor te mon dibole kosis kura nai. Etiya tok te India laga kuntu University bhi 2000 Naga Labor Corps. opor tem on diya dekha nai. Etu mon nadiya te Nagaland laga University bhi ase. Tai koishe judi Naga Hoho para Naga Labor Corps. para tai khan laga recognition nimite kaam kurile toh Naga Corps. khan toh bishi samay agote para recognition pai jabole thakishe.
All Nagaland Private School Association (ANAPSA) para special cover release kurishe. ANAPSA president Mr Andrew Ahoto para special cover laga release opor te khata para kotha kurishe. Tai koishe Health aro Education toh aki logote jabole lage koishe. Mr Ahoto koishe government para private school opor te mon na diya laga kotha koishe. Hoile bhi hossa te toh private schools khan toh government schools khan para bishi bhal kuri ase koishe.
Dimapur laga Deputy Commissioner Shri Kevekha Kevin Zehol, NCS para tai laga speech te Naga Labor Corps. laga sob khandan manu khan ke khushi pa janaishe. Mr. Kevekha Kevin Zehol stamp collection laga importance opor te kotha kurishe. Tai koishe etu stam collection para ami khan ke geography aro history aro dusra kotha khan opor te ami khan laga geyan dangor kuri de.
Programme toh Mr Daniel Domeh para vote of thanks de kena khotom kurishe.
Add Comment