Hungary, 6 January : Hungary laga filmmaker Béla Tarr, kun dukh dukh aru apocalyptic film khan karone jani hai ase — Damnation aru Satantango nisina — aru jun ke “slow cinema movement” laga founder koi thakishey, tai Tuesday din 70 saal umor te mari jaise. Itu khobor European Film Academy pora dise, juntu te Tarr 1997 pora member asil, aru taikhan koi dise ki Tarr itu subha ekta lamba aru serious bimari pichete mari jaise.
Organisation pora diya ekta statement te koi dise, “European Film Academy ekta dangor film director aru ekta strong political voice thaka personality laga dukh te ase. Tai sirf tar peers khan pora highly respect paise buli nohoi, duniya bhar laga manu khan pora bhi bhal paise. Dukhit poriyar anurodh ase ki eitu din khan te poriyar logot comment karone contact nokorile bhal hobo.”
Tarr “slow cinema” koi kowa movement laga ekta main exponent bhi asil. Itu style te besi bhag black aru white imagery, lamba unbroken camera shots, dialogue kom thaka, conventional plot structure nathaka aru Eastern Europe laga everyday life ke gloomy aru mundane bhabe dekhua jai. Itu sob sabse bhal bhabe tar 1994 laga feature-length film Satantango te dekha jai, juntu 7 aru adha ghonta lamba ase. Itu film te communism fall pichete Hungary laga ekta chota gaon laga struggle dekhua hoise. Itu, tai sob pora lamba film te, Tarr sabse besi critical recognition paisey buli kowa jai. Aji bhi itu film ke besi manu “all-time greatest films” laga list te rakhe.
Béla Tarr July 21, 1955 te Pécs, Hungary te jonmo loisil. Tai chota thaka time pora TV laga chota chota role te acting shuru korise, aru 16 saal umor te filmmaker hisab te kaam shuru korise. Tai laga hobby videos khan Bela Balazs Studios laga chokot porisil, aru taikhan tar first feature film Family Nest karone funding dise, juntu 1979 te produce hoise. Tai Budapest laga Academy of Theatre and Film te porha shuru korise aru 1982 te graduate hoisil. Pichete tai Tarsulas Filmstudio naam laga nijor studio shuru korise, kintu 1985 te political reason karone band koribo lagise, karon tai nijor anarchist ideas khula bhabe koi thakisil. Itu time te tai anya production khan ase The Outsider (1981), The Prefab People (1982), aru Almanac of Fall (1984).
Tai paanch number film Damnation (1988), jun ekta depressed manu aru ekta singer laga bou logot tai prem laga kahini, desh laga first independent film hisab te mark korisil. Satantango 1994 te release hoise, chay saal laga break pichete. Itu pichete tai laga aru ekta bhal naam paowa film Werckmeister Harmonies 2000 te aise. Lagbhag 1 ghonta 50 minute lamba itu film, tar wife, co-producer, editor aru companion Agnes Hranitzky logot milikena direct kora hoisil. Itu film te sirf 39 ta camera shot ase, aru sob shot khan writer Appolinus aru tar uncle laga kahini ghumai thake, Hungary communist time te, juntu ekta bhoy laga Circus gaon te aha logot jori thaka ase.
2007 te, Tarr aru Hranitzky pora produce aru direct kora film The Man From London, juntu te Tilda Swinton acting korisil, Cannes Film Festival te release hoisil. 2011 te, Tarr The Turin Horse Berlin Film Festival te release korisil. Itu film te Turin, Italy te ekta ghora pitua laga ghotona dekhua hoisil, jun ke Friedrich Nietzsche laga insanity laga karon buli kowa hoi. Itu movie grand prize jitise, aru Tarr koi dise ki itu tai laga last kaam hobo.
Béla Tarr pichete tar wife Agnes Hranitzky ke chari jaise.
Add Comment