GUWAHATI | February 27: Tuesday te, Congress president Rahul Gandhi pora Rajya Sabha te citizenship bill pass koriya rukhaibole tai laga party pora ki kadam loise, etu olop koise aro bodnam korise ki Modi government pora Northeastern state te Rashtriya Swayamsevak Sangh (RSS) ideology halikena culture aro jeevan neum ke hamla kori ase.
Assam te public rally te tai laga party laga election campaign shuru korikena, Gandhi pora koise ki Congress pora “hinsa aro kheen laga BJP-RSS ideology” logote khilaf tai khan nijor laga “morom aro khusi laga ideology” pora larai koribo.
Gandhi pora bodnam korise Arunachal Pradesh te tweijun jowan manu ke goli mariya laga hatsa, Haryana te Jats aro non-Jats laga larai, Maharashtra pora UP aro Bihar laga manu khan khetai diya aro Delhi te North-Eastern manu khan ke dhamki koriya toh “kheen laga BJP-RSS ideology” laga ekta example ase.
“BJP-RSS ideology pora North-East laga pura states khan julai ase. Tai khan pora apuni khan laga lifestyle, culture, bhasa aro history ke hamla kori ase. Tai khan pora apuni khan laga opor te Nagpur [RSS headquarters] culture lagai dibole kosish kori ase,” tai pora bodnam korise aro koise ki tai laga party pora pura North-Eastern state laga cultural identity ke suraksha koribo juti vote korikena power dile.
Citizenship (Amendment) Bill logote khilaf korikena pura North-East te protest kori thakise. Etu bill laga maksat toh Pakistan, Bangladesh aro Afghanistan laga religious minorities khan ke citizenship dibole thakise. Jowa habta, Arunachal Pradesh te choita non-Arunachali jaati khan ke permanent residency certificates dibole committee pora fesla lowa logote khilaf chamela aro hinsa ola dekhise.
“Etu (citizenship bill) toh anti North-East bill ase. Etu toh region laga culture, bhasa aro history logote khilaf ase. Etu larai te apuni khan logot moi khan bi ase. Moi khan karne sob states toh important ase. Aalag bhasa aro identities pora India bonai. Sob manu khan India te jakka pabo laage aro ekki logote aage jabo laage,” Gandhi pora koise.
BJP spokesperson Rupam Goswami pora etu bodnam ke phat jawab dise. “Ekdum dukh pora thakiya minorities khan ke Citizenship toh Rahul Gandhi laga great grandfather, Jawaharlal Nehru pora wada korise, etu ekbar bi pura koriya nai. BJP laga maksat toh sabha ase. Dukh paikena ahiya manu khan aro 70 saal laga opor te citizenship napai kena dukh powa manu khan logote moi khan khara ase,” tai pora koise.
Guwahati rally bicchete te party manu khan ke kotha koriya samoy te, Gandhi pora Northeast laga sob milaikena 25 seats pora 20 seats lobo nimite maksat bonaise. “Moi laga phabana ase ki Congress nimite Northeast pora 20-plus seats pabo, etu pora ekko gomti nai. Hoilebi moi laga phabana hisab te 22 jitibole kosish koribo laage,” tai pora koise.
Add Comment