Shillong, March 3: United Democratic Party (UDP) pora fesla korise ki Shella MDC, Teinwell Dkhar ke Khasi Hills Autonomous District Council (KHADC) laga notun Chief Executive Member (CEM) karne nominate koribo koikena.
Etu khobor toh UDP president, Dr Donkupar Roy pora teen ghonta pora besi lamba meeting bicchete koise.
Khobor laga hisaabte, notun CEM junibo nimite fesla koribo karne party leaders khan besi dukh paise kile koile Jaiaw constituency laga Paul Lyngdoh aro Sohra constituency laga Titosstarwell toh etu post nimite khara korise.
Hoilebi, UDP president pora CEM post nimite ekko diktari thakiya koise.
Tai pora koise, “Moi khan pora fesla korise ki CEM laga post toh podli korikena thuribo. Dkhar pora CEM post toh eksal nimite thuribo. Etu bicchete CEM laga post toh Paul Lyngdoh aro Titossarwell Chyne laga majote podli korkena thuribo.”
Etu samoy te, tai pora koise ki agreement laga hisab te, Regional Democratic Alliance (RDA) aro NPP pora bona notun People’s Democratic Alliance (PDA) logote KHADC laga notun EC te panchta Executive Members (EMs) thakibo.
Tai laga hisab te, jarta EM post toh UDP laga haat te jabo aro ekta EM post toh HSPDP laga haat te jabo. Mawlai independent MDC, Teibor Pathaw pora bi RDA ke support korise.
Etu samoy te, Deputy Chief Minister, Prestone Tynsong pora koise ki PDA aro RDA toh Monday te aro meeting buhibo, etu bicchete hi KHADC laga akhiri coalition(alliance) olaibo.
Tai pora koise ki Mawkhar-Pynthorumkhrah MDC, PN Syiem ke KHADC te NPP laga PP leader karne junise.
Tynsong pora bi koise ki NPP pora panchta EM posts charikena Council Chairman laga post nimite junibole fesla koribole ase.
Tynsong pora aro khobor korise ki notun MDCs khan laga kosam lowa din toh March 6 te thakibo koise aro Council laga chairman toh ahiya din te junibo.
Add Comment