IMPHAL, March 5: Manipur Chief Minister N Biren Singh pora Monday te state Assembly ke koise ki indigenous Meitei jaat khan ke Scheduled Tribe (ST) list te halibole demand koriya toh thik ase.
Etu demand toh thik ase koikena, Singh pora koise ki etu mamla nimite state government pora konoba zaroori kadam loi ase.
Tai pora koise ki state laga ekdum chottu indigenous manu khan khatra te ase aro ST demand koriya toh state laga indigenous manu khan ke constitution laga kanun pora suraksha koribo nimite ase, Department of Information and Public Relations(DIPR) pora diya press khobor te enika koise.
Opposition member K Meghachandra Singh, pora Assembly laga akhiri din te Calling Attention (public laga urgent kotha kobole maatiya) kadam lowa ke jawab diye kena, Singh pora koise ki ST demand laga chamela toh purana government laga samoy te shuru hoise.
Tai pora koise ki Manipur State Commission for the Schedule Tribe Act, 2014 toh State Gazette te March 27, 2014 te khobor olaise.
August 8, 2016 te, Manipur State Commission for Scheduled Tribes toh ST demand ke jaach koribole bonaishe, tate etu committee laga chairman toh RS Golmei thakise.
Tai pora khobor korise ki state Home department pora Anthropological Survey of India logote tai khan laga expert toh etu committee te Socio Economic aro Ethnographic survey koribo nimite halibole kotha korise.
Singh pora koise ki National Commission of Schedule Tribes pora July 6, 2018 te state government laga haat te pora socio economic aro ethnographic survey nimite action lowa laga report(khobor) mangise. Etu toh Meitei jaat khan ke ST list te halibo laga kam nimite mangise.
Tai pora koise ki Ministry of Home Affairs logote kotha korikena, Ministry of Tribal Affairs pora etu mamla toh nhal pora thuri ase.
Scheduled Tribe Demand Committee (STDC) pora Sunday te Manipur laga indigenous Meitei jaat khan ke Scheduled Tribe dibo karne demand korikena ekta dangor protest rally manaise.
Add Comment