Thailand, 4 June : Lionsgate official karne tai ahibole thaka John Rambo prequel film laga production suru kori dise, aru etia Thailand te shooting cholise. Itu film te iconic action character John Rambo laga shuru te jibon aru origin dikhabo, First Blood (1982) film laga age ki hoise tai explore koribo. Film tu 2027 te release hobole plan kori ase.
Thailand laga beshi jagah te shooting cholise, juntu bhitor te Bangkok, Krabi, Phang Nga aru Kanchanaburi ase. Studio franchise laga itu notun installment laga scale aru bisi dangor kori ase.
Studio update aru entertainment report hisab te, John Rambo filmor shooting itu saal laga shurute Thailand te suru hoise. Production team Bangkok laga urban backdrop logot southern aru western Thailand laga scenic aru rugged location khan te bhi shooting koribo.
Agey pora Variety report te confirm kori dise ki film laga production Bangkok te suru hoise. Itu project Lionsgate, Millennium Media, Templeton Media aru AGBO support kori ase.
Thailand age pora Rambo franchise logot jora thakise, karon franchise laga purana film khan te bhi Thailand important shooting location ase. Notun prequel te bhi itu connection jari thakibo aru besi location use koribo kuina kotha ase.
Prequel film te actor Noah Centineo, juwan John Rambo laga role te dekhi jabo. Tai franchise laga age Sylvester Stallone kora character tu etia continue koribo.
Film tu Sisu director Jalmari Helander direct kori ase. Rory Haines aru Sohrab Noshirvani screenplay likhise.
Production team te Kevin King Templeton, Les Weldon, Jonathan Yunger, Angela Russo-Ots te aru Michael Disco ase. Executive producer khan majot Sylvester Stallone, Anthony Russo, Joe Russo (AGBO), Trevor Short, Dallas Sonnier aru Amanda Presmyk ase.
Ahibole thaka itu film te original 1982 film laga age Rambo laga shuru jibon aru tai laga character ke shape kora experience khan explore koribo kuina asha kori jai.
Panchta film loina bana Rambo franchise duniya bhar te $800 millionor besi collection kori ase, juntu Hollywood laga sabse lamba somoy chola action franchise khan majot ekta bani dise.
Project tu loina etia pora bisi charcha cholise, bisesh kori Thailand laga shooting aru Noah Centineo ke John Rambo hisab te cast kori loise. Entertainment page aru fan account khan te update share kori ase.
