New Delhi, 5 June : Christopher Nolan laga fan khan India te thaka manu khan karone ekta bisi bhal khobor ase. America te movie lover khan website crash hoi jua, lamba online queue aru scalper khan ticket ekta karone $1,500 agey te mangi thaka samay te, India te thaka audience khan ekdom alag experience pabo.
June 8 din, India te thaka movie fan khan Christopher Nolan laga bisi intezar kora film The Odyssey karone ticket book koribole duniya te sobse age thaka manu khan logot eke logot chance pabo. Homer laga purana Greek kahini upor bonai thaka itu film etiya pora duniya bhar te bisi dangor cinema event hisab te dekha jai ase. Kintu film laga kahini nohoi, itu technology bhi sob manu laga nazor tanise.
The Odyssey cinema itihas te first feature film ase jitu pura-puri IMAX camera loi shoot kora hoise. Nolan bishi saal pora IMAX format laga bisi supporter ase, aru The Dark Knight, Dunkirk aru Oppenheimer nisina film khan te etu use korisey. Dui decade nisina time pora itu technology loi pura film shoot koribole bisari thaka Nolan etiya tai laga sapna pura korisey.
India te thaka audience karone early booking khuli diya tu ekta dangor bodol ase. Agey te London nohoile New York nisina city te ticket sale start hoi jaise, kintu India te thaka fan khan wait koribo lagise. Itu bar India bhi global rollout laga part ase, jitu karone fan khan duniya laga baki market logot eke logot nijor favourite IMAX seat book kori lobole paribo.
Film laga demand ketia iman bisi ase, etu June 4 din US te ticket sale khuli diya pora dekhibole paise. Demand iman bisi ase ki AMC, Fandango aru Regal nisina ticketing website khan technical problem face korisey. Website thik hoi jaa pichete bhi bishi fan khan ghonta-ghonta online queue te thakibo lagise.
Itu pichete scalper khan bhi sujog loi dise. Report hisab te eBay nisina resale website khan te ticket khan hundred-hundred dollar te becha start kori dise. Ekta IMAX 70mm show laga ticket toh $1,500 te list kora hoise buli khobor ahise. Etu dekhaise ki film karone excitement kiman bisi ase.
Duniya laga alag-alag jagah te notun IMAX film technology use kori The Odyssey shoot korise. Nolan laga target hoise audience khan ke age pora nadekha nisina ekta immersive experience dibole. Film lag agey shot IMAX camera te shoot kora karone picture quality aru scale duita bhi bisi dangor hobo.
Film te Homer laga purana Greek epic kahini dikhabo. Kahini Odysseus, Ithaca laga Raja, tai laga upor ghuri ase. Troy laga juddho khotom hoi jaa pichete, tai nijor ghar, biwi aru lora logot ghuri ahibole try kore. Kintu rasta te monster, dangor tufan aru tai laga khilaf thaka devta khan logot tai laga mukabila hobo lage.
Nolan itu film karone ekdom star-studded cast jama korisey. Matt Damon Odysseus laga role te ase, jitia Tom Holland tai laga lora Telemachus laga role te dekhibole pabo. Anne Hathaway Penelope, Odysseus laga biswashi biwi laga role te ase. Cast te Zendaya, Robert Pattinson, Lupita Nyong’o, Charlize Theron aru Jon Bernthal bhi ase.
Film laga demand etiya pora record level te thaka karone, IMAX screening khan jaldi sold out hobo kuina asha kora jai. June 8 India te thaka cinema fan khan karone sabse busy ticket booking din khan majot ekta hobo pare.
