China, 16 June : China te choli thaka Boxing World Cup (Stage 2) laga opening day te Deepak aru Poonam khali India laga dui winners hisab te ulaina ahise, nijor-nijor categories laga next round te qualify kori kena. Kintu 7 Indian boxers defeat paise.
Women’s 54kg category te Poonam para Uzbekistan laga Aziza Yokubova ke preliminary Round of 32 te ekdom dominant 5-0 decision pora harai kena next round te jaise.
Deepak para bhi men’s 70kg division te etu nisina strong performance dikhai dise. Tai para Turkmenistan laga Bayramdurdy Nurmuhammedov ke unanimous 5-0 verdict pora harai kena preliminary Round of 32 pora agey barhi dise.
Kintu baki Indian boxers khan competition te agey jabo para nohoi.
Preliminary Round of 16 te Rishi Singh (50kg) para Azerbaijan laga Subhan Mamedov logot harise, ketiya Sanamacha Chanu Thokchom (75kg) para Canada laga Tammara Thibeault logot defeat paise.
Sawan Gill para bhi men’s 90kg category te Norway laga Omar Shiha logot hari kena tournament pora bahar hoise.
Anya preliminary bouts te Anmol (60kg) para USA laga Salim Ellis Bey logot ekdom close 2-3 decision pora harise.
Eki logot, Harsh Choudhary (90kg) laga bout third round te injury karone bond kori dibo lagise. Tai para Sweden laga Elwin Belezika logot Referee Stops Contest tou Injury [RSC (I)] karone defeat paise.
