Nagaland te Dail daam besi huise

DIMAPUR, SEPTEMBER 12 : Tuesday din Dail kan laga daam besi huijaise. Etu pora Maharashtra laga ekta Town te toh Petrol dail laga daam toh 1 litre te Rs. 90 manga huise. Aro etu toh India desh laga majutte besi wala ase koise.Maharashtra state laga Parbhani town te Petrol dail laga daam toh 1 litre te Rs. 90.02 poisa mange ase. Etubi Mumbai pora 500 km dur jaka te thaka Town te. Kele Local Taxes aro aha-jua kura laga nemite bi poisa besi manga huijua pora. Etu bejete Nagaland state te bi Petrol dail laga daam toh 1 litre te Rs. 80 bara huijai kena ase. Tuesday din te toh Nagaland state majutte Tuensang District te besi wala thakise. Etub Petrol dail 1 litre te Rs. 80.85 hisabte mange thakise koi kena. Etu bejete Kiphire district te toh 1 litre te Rs. 80.75 manga huise, Zunheboto te Rs. 80.41, Phek te Rs. 80.35 aro Lonhleng te Rs. 80.10 manga huijai kena thakise koise.Dimapur te Petrol dail laga daam toh 1 litre te Rs. 78.59 ase aro Diesel dail laga daam toh 1 litre te Rs. 70.74 ase. Aro Kohima te Petrol dail 1 litre te Rs. 79.35 ase aro Diesel dail 1 litre te Rs. 71.31 ase koise. Petrol dail daam bi besi hua majutte Diesel dail laga daam bi Tuensang te besi huijai kena ase. Etubi 1 litre Diesel dail te Rs. 72.67 litre. Mumbai te toh Diesel dail daam toh 1 litre te Rs. 77.47 huijai kena ase, Delhi te Petrol dail daam toh 1 litre te Rs. 80.87 aro Diesel dail daam toh 1 litre te Rs. 72.97 huijai kena ase koise.Etu Dail daam kan besi uthe jua nemite besi hala-chila kurikena Protest bi manai thakise. Huilebi Centre kan olop manbi saidebole kura nai. Etu karne 2 jun States kan tai kan neju State Taxes kan olop komti kuridebole kurise. Etu ke Rajasthan state pora Petrol aro Diesel dail laga daam toh 1 litre te Rs. 2.5 poisa pora komti kuridese. Aro Andhra Pradesh state te toh Rs. 2 poisa pora kom kuridese. Etu oporte West Bengal state laga Chief Minister Mamata Banerjee pora Tuesday din tai kan Sorkar pora bi Petrol aro Diesel dail laga daam kan toh 1 litre te 1 dokka pora komti kuridese koise.