Moderna Vaccine para 16 Monkeys logot protect thishe, 30,000 manuh logot test loboli ase

July 29, 2020. Covid-19 bemari kelaaf te Moderna Inc.’s vaccine candidate para 16 monkeys logot trial kura tuh bhal result paishe aro bemari thaka samay manuh logot be loboli parebo koishe. Vaccine laga tuita(2) injections para virus besi thaka ke tuita(2) alak dosage para protect kuriboli paribo koishe. Tuesday din te, Moderna para New England Journal of Medicine te janai thishe. Result tuh, joti virus tuh manuh logot ase koile, etu vaccine para Covid-19 ke oper aro neji airways te be protect kuriboli parebo. Monkey kuan khan ke vaccine laga high doses tuh thishe, tui din thakina virus ke challenge kura beche, tai khan laga nak te eku beya sign thika-nai, koikena study laga result para koishe. Aro koishe ke, virus logot challenged kuriboli deya beche, 7 to 8 janwar laga lung fluid te eku viral replication kowah tuh thakanai. Sob melaikena 16 monkeys logot protection sign tuh olop thikaishe aro tuita(2) groups laga lungs te lung inflammation tuh limite thikaishe koishe. Etu date para encourage kurikena, Moderna khan etu logot be tangor test loboli ase, etu samay 30,000 manuh khan ke lobo koishe. phase 3 trial para vaccine laga safety aro efficacy tuh saboli ase aro etu laga data tuh November nahoile December moina te olaboli ase koishe. Vaccine tuh messenger RNA choi, etu tuh saman para body laga immune system ke attack mode te raki dey koishe. Etu vaccine bonaboli nemite United States laga government para $955 million motob thishe. New York city te, Moderna laga share tuh 2% para $81.49 te othikena ase koishe.