Family lawyer para Sushant logot insurance policy nai koishe

New Delhi: September 3, 2020. Actress Rhea Chakraborty nemite campaign thakina aro SSR laga family ke botnam kurikena aro Rhea laap hoboli nemite konuba manuh khan para kam koriase koikena Sushant  family laga lawyer Vikas Singh para koishe. Lawyer para koishe ke, Sushant Singh Rajput toh insurance policy nai. Sushant laga baba logot nahotikena kuan para be Sushant Singh Rajput oper te “film, serial nohoile ketab nalikiboli janai thishe. Tai para aro koishe, “ami khan besas ase ke CBI para etu case te oper para neje dak te khobor bahl anibo aro etu nemite family manuh sob justice baboli rokiase”. Etu samay, CBI sources para koishe ke, Rhea laga baba Indrajit ke Sushant aro Rhea pithor te financial links thaka sawal be hotishe. CBI sources para aro koishe, agency khan para tai ke Sushant ke keneka hoikena janishe etu hotibo, keli koile tai laga bacha logot relation thaka nemite aro tai khan  investments plan bonai thaka toh be hotibo. Sushant Singh Rajput mora case toh hotai ek din- ek din hoikena dhuk wala jaiase. Tuesday din Rhea Chakraborty laga parents khan ke CBI para sawal hotiboli matishe koishe. Ath(8) gonda sawal kora beche, BCI para Rhea laga baba aro ama– Indrajit aro Sandhya Chakraborty toh  Wednesday 10:30 am neshina te pongchishe. Rhea ke toh matanai koishe, tai laga bhai Showik ke toh jaa hafta fisrt time CBI khan para sawal korishe koishe. Showik laga nam te olaishe koishe, mora case oper te tawai beka manuh khan para koishe ke, tai khan para Showik logot be tawai toh bekai thakishe. Tawai bekeri kora manuh toh Mumbai te Tuesday rati te thurishe koishe.