West Bengal te chakara

RAIGANJ (WB), SEPTEMBER 21 : West Bengal laga North Dinaipur jaka te Thursday din pora hi Police aro bhorta jun manu majutte chakara huikena besi chamala thakise. Etu pora Thursday din te 1 jun Rajesh Sarkar koi kena ITI Student murise. Aro Friday din te bi College Student kobi Tapas Barman koi kena mata toh jukum huikena North Bengal Medical College aro Hospital te murijaise koi kena, Officials pora janaise.Etu chamala pora BJP Party kan pora bi 12 khuntha pura baan thakibole kuribo koi kena kotha ula huise. Etubi West Bengal laga District te. Local manu kan pora koa hisabte etu students mura toh Police kan pora puntuk mara pora ase koi kena janaise. Huilebi DIG Raiganj Range laga Jayanta Paul pora etu toh mesa ase koi kena janaise.Etu 2 jun mura Students toh ekta Islampur jaka laga manu hi ase. Aro Daribhit High School laga purana Student nemite thaka laga ase koise.Khobor hisabte etu chamala toh sob Urdu Teachers nemite Recruitment manabole kuribo koa karne ula chamala ase. Kele etu Urdu Teachers anedebole koa ke Students kan khilaf kurise. Aro Students kan ulta Science aro English teachers wala hi anedebole kuribi koi kena kotha ulaise. Kele etu Science aro English nemite hi Teachers lagi ase koi kena. Aro etu jaka laga manu aro students kan etu Urdu Teachers kan ke etu school te ahebole nade kena thakise koise. Etu pora etu school laga authorities kan Police laga motub manga huise. Aro etu pora police aro etu jaka laga manu kan laka-laki huikena chakara hua laga ase koise.