Paris bars, 2 hafta nemite bondh thakibo

October 6, 2020. Paris te Tuesday din para tui(2) hafta nemite te Bars sob bondh koriboli koishe. Etu fesla toh French government laga notun hokom te coronavirus bemari cases besi utha para ase. Etu fesla lowa toh government para Covid-19 alert toh maximum level te uthai thishe, keli koile, etu chaka te bemari rate toh 100,000 manuh pithor te 250 ase aro komti hoilebi, intensive care bed toh 30 per cent neshina bemari manuh logot rakina ase, koikena BBC para khobor toh janai thishe. Prime Minister Jean Castex laga office statement para koishe ke, “etu kam te virus phela larai karne ase aro etu Paris te aro tinta departments te tui(2) hafta nemite hobo”. Monday din dorusa fesla toh janai thibo. Bars toh bondh thakbo, restaurants aro khana dukan aro alcohol dukan toh kula thakibo, aro 10.p.m te bondh koribo. Bars bondh thakibo nemite, Interior Minister Gerald Darmanin para koishe ke, Parisians nemite alag koribo. “ami khan French manuh nemite, ami khan drinks toh kushi pai, kaboli, thakibole, aro kiss koriboli” koikena BBC para Minister para kowa kotha toh French TV channel LCI aro Europe 1 te Sunday din te janai thishe. September 26 darik te, Marseille kaun French laga sobse third tangor city ase, bars, restaurants aro gyms toh tui(2) hafta nemite bondh koriboli janai thishe. France te, August moina para loikena Covid-19 bemari cases utha toh besi hoi ase koishe. Saturday din te, desh te 17,000 neshina cases paishe aro etu ek din pithor laga sobse besi wala cases utha ase. Etu laga agae din te, 12,565 Covid-19 cases paa khobor thakishe. Monday din France te, sob melaikena 629,509 cases thakishe aro manuh mora toh 32,171 hoikena ase koishe.