ISIS para Vienna hamla te nam loishe

November 4, 2020. Monday din city center Vienna te gooli mara beche Police officers khan para Vienna te guard kori thakishe. Global terrorist group Islamic State, ISIS koikena, Tuesday din Austrian capital Vienna te hamla kora toh tai khan para ase nam loishe. Hamla samai komti hoilebi char(4) jun morishe aro 14 manuh jokom korishe. ISIS para official online channel te video olai deya te ek jun manuh, nam toh Abu Dujanah Al-Albani para machine gun, pistol, aro dao thurikena Monday rati marikena peraishe, etu beche police para tai ke be morai thishe. Austrian authorities laga khobor hesab te, etu manuh toh Austrian aro North Macedonia citizenship thakishe, etu samai ISIS para koishe ke tai toh Albanian manuh ase. Etu 20 umer manuh para toh Syria te ISIS te samil koriboli mon thaka nemite thurishe aro 22 moina jail paishe aro tai jawan thaka nemite 7 moina he jail paishe. ISIS khan para etu manuh laga video be thikaishe, etu samai tai toh leader Abu Ibrahim Al-Hashimi osor te kosom korishe. Tai toh black T-shirt lakina thakishe aro hamla kora samai bantok toh be thurikena thakishe. IANS khobor hesab te, 14 manuh ke thurikena ase aro etu hamla kora oper te police para manuh ke pesarina perai ase. France te tangor hamla howa beche, olop din pithor te Vienna te be hamla kora ase koishe. October 16 darik te, middle-school teacher, Samuel Paty ke 18 umer Muslim immigrant, Abdullakh Anzorov para Paris osor te school ekta pithor te matha kati thishe. Etu beche, October 28 darik te, Brahim Aouissaoui, 21 umer Tunisian manuh para Nice city laga Notre-Dame Basilica chaka te tin(3) jun manuh ke chako para marikena morai thishe koishe.