Indonesia Safety Panel para tuita(2) Black Boxes paishe

Jakarta, Indonesia: Sunday din Indonesian authorities para koishe, capital Jakarta para Sriwijaya Air jet jowa beche paani te crashed howa te black boxes toh paishe. Etu oper te manuh laga body aro suspect kora plane laga saman khan be othaishe koishe. Boeing 737-500 toh 62 passengers aro crew manuh logot Pontianak ,West Kalimantan te Saturday din jowa beche 4 minute beche radar para hari jaishe. Indonesia 2018 sal te Lion Air Boeing 737 Max te 189 passengers aro crew manuh khan Java Sea te morishe, etu samai Soekarno-Hatta International Airport te jowa beche hoishe. Notun crash nahow akhe te Indonesia te crash kora neshina kaun desh te hoikena nai,koikena Aviation Safety Network’s database para janaishe. Indonesia National Transport Safety Committee chief Soerjanto Tjahjono para koishe, Flight SJ 182’s laga tuita(2) black boxes toh paishe. “ami khan para black boxes toh jolti paishe” koikena military chief Hadi Tjahjanto para janaishe. Rescuers khan para Jakarta te plane laga pieces toh anishe. Authorities para koishe, 23 metres (75 feet) depth te Jakarta osor ekta grou islands te paishe. Ektqa piece metal toh Air’s blue aro red colours te painted hoikena thakishe. Indonesian authorities khan para body para aro kapra khan ke othaishe koishe. Police para mora manuh laga ghor manuh khan ke dental records aro DNA samples toh janiboli nemite mangkishe. Plane te 12 crew manuh aro 50 passengers thakishe, sob be Indonesians thakishe etu pithor te 7 bacha aro 3 babies be samil ase. President Joko Widodo para Bogor te kotha kora samai koishe, “manuh mora nemite mon besi dukh ase”, aro public logot manuh paboli nemite parthana koriboli janaishe. Tracking service Flightradar24 para koishe, aircraft toh 2:36 p.m. local time (0736 GMT) te jarishe aro 4 minute pithor te 10,900 feet te othishe. Itya dak jet toh kenika hari jaishe eku khobor nai. Transport ministry spokeswoman para kowa toh traffic control para pilot logot tai jaboli jag ate nahoikena keli northwest te jaishe hotishe. Pilots khan toh besi sal para experience ase aro flight captain toh air force pilot thakishe aro co-pilot toh Sriwijaya Air te 2013 sal para kam korikena aha manuh ase koikena Linkedin profile para janaishe. Sriwijaya Air plane toh 27 sal Boeing 737-500 ase koishe.