April 7, 2021. Jowa hafta Chhattisgarh, Bijapur te Naxals logot bantok para larai kora te jawan ek jun hari jowa laga 1st noksa toh thikaishe. India TV laga khobor hesab te, Naxals para noksa thika toh CRPF para be hari jowa commando laga noksa ase koikena junaishe. Hari jowa commando toh 210th CoBRA (Commando Battalion for Resolute Action) battalion aro CRPF unit para constable Rakeshwar Singh Manhas ase koishe. Tai toh April 3 darik Sukma-Bijapur border osor te Naxals aro security personnel pithor te bantok larai samai hari jaishe. Tuesday din te, Naxals khan para statement te CoBRA commando toh tai khan laga hath te ase koikena janaishe. Tuita(2) page letter te, banned Communist Party of India (Maoist) para koishe ke, Naxals khan centre logot kotha koriboli monjur ase. Naxals para government logot Manhas ke jariboli nemite kotha kora manuh ekta juniboli koishe. “ami khan laga hath te jawan ek jun ase aro ami khan government logot kotha koriboli monjur ase. Ek jun manuh kotha koboli junibe aro ami khan para etu jawan ke jaribo. Police jawan toh ami khan laga dushman nahoi,” koikena Naxals khan para letter te janaishe.
Naxals para CRPF commando noksa thikaise
Add Comment