Lucknow, Kanpur, Varanasi te rati curfew junaishe

New Delhi: India te Covid-19 cases besi othi-thaka nemite, Uttar Pradesh’s capital Lucknow, Kanpur aro Varanasi te Thursday rati para rati samai curfew thakiboli ase koishe. Wednesday din Lucknow Police Commissioner, DK Thakur para koishe ke, “aha kali para Lucknow te rati samai 9 pm para loikena 6 am dak curfew thakiboli ase”. Etu rati curfew toh April 30 darik dak thakibo” koikena Mr Thakur para junaishe. Lucknow District Magistrate para koishe ke, “Lucknow te sob government, non-government, private schools, colleges aro educational institutions aro coaching institutes toh bondh thakibo, kali medical, nursing aro para-medical institutes toh kulibo, etu hokom toh Covid-19 bemari rokabo nemite ase aro April 15, 2021 dak thakibo”. “hoilebi recognized educational institutions, examinations/practicals toh COVID-19 protocol pithor te strict kam koribo,” koikena magistrate para janaishe. Bemari cases besi otha nemite in Kanpur aro Varanasi te be rati curfew toh lakai thishe. Kanpur District Magistrate para koishe, “Kanpur te rati curfew toh April 8 darik para 10 pm -6 am dak thakibo aro April 30 darik dak koribo.” Varanasi Commissioner of Police para be koishe ke, “April 8 darik para Varanasi te hafta pura curfew toh 9 pm para soruh koribo.” Etu samai, 24 gonda pithor te notun Covid cases toh 1,15,736 paishe. Wednesday din India te sobse besi cases recorded korishe. Etu cases otha nemite, sob melaikena India te 1,28,01,785 hoikena ase. India te 24 gonda pithor 630 manuh COVID bemar para morishe, etu samai active cases toh 8,43,473 hoikena ase, etu khobor toh Wednesday din Union Health Ministry para janaishe. 24 gonda majot te 59,856 manuh etu bemar para bhal hoishe aro1,66,177 manuh morikena ase.