New Delhi: Delhi te sobse tagnor Hazrat Nizamuddin Aulia Dargah toh April 30 darik para bondh thakiboli junaishe. National Capital te COVID-19 cases besi othi-thaka nemite ase, koikena Saturday din Chairman Afsar Ali Nizami para khobor toh janaishe. “Capital te hotai din coronavirus cases besi hoi thaka nemite etu fesla toh ami khan para loishe. Ami khan para COVID-19 protocols neshina face mask lakaina social disitance mani thakilebi, ami khan laga bapana te sobse bhal toh dargah bondh korile bhal hobo aro April 30 darik para bondh thakibo,” koikena Dargah Sharif Hazrat Nizamuddin Auliya laga chairperson Mr Nizami para koishe. Jodi etu bondh korikena halat toh aro bhal nahoile, dargah toh aro besi din nemite bondh koribo, tai para aro janaishe. Ramadan laga holy moina toh itya jai-ase aro duniyaa pura te Muslim manuh khan dargah te ahi ase. Saturday din online meeting kora samai, Delhi Chief Minister Arvind Kejriwal para koishe ke, COVID-19 bemari cases toh besi jolti othi ase aro jowa 24 gonda pithor te notun 24,000 cases thura laga khobor ase. National Capital te bemari soruh kora beche etu 1 din pithor laga sobse besi cases ase aro etu oper te national capital te bemari para 141 manuh mora khobor paishe. Saturday din, India te aro2.34 lakh cases thura record ase. Sob melaikena India te bemari cases toh 1.45 crore oper hoishe aro 24 gonda pithor te 1,341 manuh morishe, etu melaikena 1,75,649 manuh bemar para morikena ase koishe.
