April 24, 2021. Friday din te Dibrugarh University para exam jai thaka aro ahiboli exam toh university te 16 students logot 24 gonda pithor te Covid-19 positive test thura nemite postponed korishe koishe. University laga tinta(3) hostels te bemari cases thura nemite health authorities para containment zones junai thishe. Dibrugarh University controller of examinations, PK Kakoty para Friday din notification te janaishe ke, postgraduate (PG) examinations (traditional aro professional) etu oper te Integrated MSc in Physics toh notun notification napa dak postponed thakibo. Etu neshina, sob undergraduate (UG) professional examinations aro BEd, B Tech, LLB, BA LLB (H), BCom LLB (H) aro BBA LLB (H) toh be postponed hoishe. Itya jai thaka non-CBCS (choice-based credit system) mode pithor te BA, B Sc aro B Com exam toh be April 26 darik para postponed thakibo. “postponed kora exam laga darik aro samai toh government of Assam aro UGC laga guidelines/SOPs pithor te janai thibo,’ koikena notification te koishe. Olop din akhe te, Dibrugarh University para tuita(2) choice-based credit system (CBCS) aro non-CBCS exam April 19 aro 20 darik te loboli thaka toh be postponed korikena ase. Dibrugarh te bemari 2nd wave thaka nemite COVID-19 cases toh besi othikena jaiase. Thursday din te 3,665 Covid tests kora pithor te 126 positive cases thurishe koishe. Dibrugarh laga Integrated Disease Surveillance Programme officer, Dr. Nabojyoti Gogoi para koishe ke, “manuh khan sob masks lakaina government para guidelines deya toh maniboli laki. Ami sob manuh ke social distancing jolaboli koi ase aro jodi pareli ghor pithor te thakiboli janaishe ase.”
Dibrugarh University para sob exam postpone korishe
