April 27, 2021. Monday din Upper Assam Tinsukia district, Sadiya para tin(3) jun ONGC employees kidnap kora connection te police constable ek jun ke thurishe koishe. Etu police constable toh Basanta Buragohain ase aro tai toh 25th AP(ONGC) Branch, Sivasagar te posting ase. Buragohain toh Tinsukia district laga Chapakhowa, Sadiya jaga te thaka manuh ase. April 21 darik te tin(3) jun employees hara beche, tai duty te report kora nai. Sadiya police para police constable ke thurikena investigate kori ase koishe. “Basanta Buragohain toh Ulfa(I) group logot melikena thaka nemite thurishe. Tai ke ami khan laga custody te anishe aro tai logot sawal kori ase,” koikena police laga khobor hesab te janaishe. Friday din tin(3) jun ONGC employees ke Ulfa(I) cadres para thura pithor te tui(2) jun ke toh othaishe. Etu kam toh Indian Army aro Assam Rifles melikena operation kora te Nagalanad laga Mon district te paishe. Employees laga nam toh Alakesh Saikia aro Mohini Mohan Gogoi ase. Etu tin(3) jun ONGC employees ke Ulfa(I) cadres para ambulance te upper Assam, Sivasagar district laga Romonia workover RIG, Lakuwa para thurikena jaishe. Etu samai security forces khan para tinta(3) wala employee Ritul Saikia ke pachabo nemite counter insurgency operations aro search operation kori ase koishe. April 22 darik te Sivasagar police para ONGC employees kipnap kora connection te 14 manuh ke thurikena ase. Suspects kora te etu kipnap case te Assam police personnel tai khan 5 jun samil ase koishe. “ami khan itya investigate kori ase aro etu kipnap case te dosura police personnel samil thaka laga kotha toh besi koboli naparibo. Etu kidnap case te kaun manuh samil thakibo najaribo,” koikena police para janaishe.
ONGC kidnapped case te police constable thurishe
