Assam tea gardens te Covid-19 cases besi othi-ase

May 9, 2021. Upper Assam tea garden te ek hafta oper hoishe ke Covid-19 positive cases toh besi jai thaka thiki ase. Tea gardens te kam kora manuh 500 neshina ke virus bemari toh thurishe, koikena officials para janaishe. Saturday din dak te officials khobor hesab te, 14 districts te komti hoilebi 503 tea garden te kam kora manuh logot positive tested paishe. Etu districts toh- Dibrugarh, Biswanath, Nagaon, Sonitpur, Golaghat, Lakhimpur, Tinsukia, Udalguri, Charaideo, Kamrup (Metro), Baksa, Darang, Dhemaji aro Sivasagar ase. North Eastern Tea Association (NETA) para state government logot joldi te tea garden te vaccination camps thakiboli janaishe. NETA para letter te Principal Secretary, Health & Family Welfare Department, aro 34 Deputy Commissioners ke second wave bemari para tea garden population pachabo nemite joldi te tea gardens te vaccination camps soruh hoboli janai thishe. NETA adviser Bidyananda Barkakoty para koishe ke, Dibrugarh district te tuita(2) tea estates toh containment zones janaikena ase. “jowa saal tea garden te etu paar neshina dukh thaka  nai, eut nemite halat besi beya nahowa akhe te tea gardens te vaccination camps soruh koriboli sobse tangor kam ase. Etu samai, government para vaccination camps thaka te NETA para kotha manibo.” Koikena Barkakoty para koishe. NETA para aro kam kora manuh aro tai khan laga ghor manuh oper te bemari phela samai besi tangor awareness campaign thaki ase koishe. Industry body, Tea Association of India (TAI) para olop din akhe te koishe ke, Assam aro West Bengal te etu paar season laga kam toh besi beya jai ase koishe. TAI Secretary-General P.K. Bhattacharya para koishe, lockdown besi thiri thaka nemite Assam aro Bengal laga tea industry te tea toh 140 million kg neshina noksen hoishe. Assam te 850 tea estates thaka neshina te tea garden te kam kora manuh toh 10 lakh opera se koishe.