Arunachal: May 17 para 18 umer oper vaccine soruh

May 14, 2021. Arunachal Pradesh Chief Minister Pema Khandu para junaishe ke, 18 umer para loikena 44 umer manuh khan logot May 17 darik para state government para vaccination drive soruh koribo. Etu khobor toh Chief minister Khandu para twitter te junaishe. “Arunachal state te 18-44 umer nemite 17th May 2021 para vaccination soruh hobo. Health department para 15th May darik te registration toh Cowin portal te khobor toh janai thibo koishe. Ami manuh khan logot request kori ase ke, http://cowin.gov.in te jaikena vaccine loboli registered koribe,” koikena CM para janaishe. Wednesday din Arunachal Pradesh te 20,180 vials ‘Covishield’ pongchise koishe. Etu din te chief minister para aro junaishe ke, Arunachal te  500 oxygen beds aro 7 oxygen generation plants toh state te etu moina pithor te bona kotom hobo. Chief minister aro health officials khan etu din te oxygen nemite kam toh saikena khobor toh social media te janaishe. “hospital te oxygen kam toh saishe, kushi ase ke etu moina pithor te 500 oxygen beds aro 7 oxygen generation plants bona kotom hoikena kam soruh koribo. Ami para 1000 oxygen beds aro extra oxygen generating plants othaboli koishe,” koikena Khandu para dosura kotha ekta te janaishe.