Congress MP Rajeev Satav Covid para morishe

New Delhi: Senior Congress leader aro Maharashtra para Rajya Sabha member, Rajiv Satav toh Covid-19 bemari para hospital te 23 din larai kori thakina Sunday din te morishe koikena party officials para khobor toh junaishe. Tai toh 46 umer thakishe aro Congress leader Rahul Gandhi team pithor te besi tangor manuh thaka ase koishe. Congress spokesperson Randeep Surjewala para Rajiv Satav mora kohobor toh Twitter te janaishe. April 19 darik te Satav logot Covid symptoms thaka nemite swab test korishe aro April 21 darik te positive test khobor toh paishe. Tai laga halat beya howa nemite Pune, Jehangir Hospital te admitted korishe aro ek hafta thaka beche ventilator te loikena jaishe. Etu beche tai bemar toh bhal hoishe, hoilebi jowa hafta aro tai laga halat beya howa nemite ICU te thakishe aro aji pujur morishe. Health Minister Rajesh Tope para Friday din te koishe ke, Covid-19 bemar jarikena Satav logot cytomegalovirus bemar aro dosura bemari be thakishe koishe. State Revenue Minister Balasaheb Thorat para hospital toh visit korishe aro tai laga halat nemite inquired loishe. Etu oper te Minister of State for Agriculture aro Congress leader Vishwajeet Kadam para be tai laga ghor manuh logot hospital te khobor loi thakishe koishe.