Tripura te May 17 para 14 din Curfew janaishe

May 16, 2021. Covid-19 cases besi othi-thaka nemite Tripura government para Agartala Municipal Corporation (AMC) areas te May 17 darik 5 am para loikena 14 din nemite curfew thakiboli fesla loishe. Saturday din te Northeast Now logot kotha kora samai, State Secretariat laga khobor hesab te State Executive Committee para Agartala Municipal Corporation (AMC) wards sob te Covid-19 bemar phelai rokabo nemite curfew thakiboli fesla korishe. “virus pheli thaka toh besi tangor bapana hoishe, West Tripura district laga graph toh 15 din pithor te 70% cases hoishe. District te sob tui(2) din pithor te 1,001 positive thura te 502 cases toh AMC jaga para thakishe,” koikena khobor para janaishe. Agartala Municipal Corporation (AMC) te sob melaikena 49 wards aro aro 6 lakh manuh laga population ase. May 12 darik te, West Tripura district administration para Agartala Municipal Corporation (AMC) ward Nos. 5, 21, aro 46 toh containment zones junai thishe. “etu nemite chief secretary Manoj Kumar para detailed guideline janai thibo aro etu samai Standard Operating Protocols (SOP) aro kaun services maaf koribo janaiboli,” koishe. Director of Family Welfare & Preventive Medicine, Dr. Radha Debbarma para koishe ke, Abhoynagar te Jawahar Lal Nehru Balika Niwas te bohi thaka 36 bacha logot Covid-19 positive thurishe koishe. Etu bacha khan laga toh 5 para loikena 13 umer ase. “etu bacha sob asymptomatic ase, tai khan laga halat toh bhal howa nemite ghor te bohi thakibo aro jodi tai khan elaj lakile care centres te loikena jabo,” koikena khobor toh Debbarma para janaishe. Saturday din, Tripura te 449 positive cases thurishe aro etu bemar para tui(2) jun morishe. Itya dak te sob melaikena 4,102 active cases ase.