May 17, 2021. West Bengal te Mamata Banerjee-cabinet te tuita(2) ministers aro TMC MLA ek jun ke CBI para Narada Scam connection te thurishe koishe. Monday din Narada case te tuita(2) ministers aro TMC MLA ek jun ke CBI para thura nemite West Bengal Chief Minister Mamata Banerjee toh CBI office Kolkata pongchise. Monday pujur te, West Bengal ministers Firhad Hakim aro Subrata Mukherjee, TMC legislator Madan Mitra aro former minister Sovan Chatterjee, ke CBI para thurishe. Tai khan 4 jun ke be tai khan laga ghor Kolkata te thurikena loi-jaishe. “ami ke thura ase etu nemite Court te karai koribo,” koikena Firhad Hakim, tai laga ghor para loikena jowa samai koishe. Olop din akhe te, West Bengal Governor Jagdeep Dhankhar logot chargesheet file kora nemite tai para CBI logot etu 4 jun thurikena sajai thiboli janaishe. Etu manuh khan toh sob state ministers ase aro tai khan para Narada sting operation samai poisa lowa thikishe. Trinamool Congress para etu nemite tangor protest korishe aro etu kam toh “politically para kora” ase koishe. “lawyer hesab te etu thura illegal toh ase, kaun para hoilebi MLA khan ke thuriboli toh state Assembly Speaker logot khobor koriboli laki. CBI khan kali Governor logot koishe,” koikena West Bengal Legislative Assembly laga lawyer aro Speaker, Biman Bandopadhyay para janai thishe.
Narada Scam: CBI para 2 West Bengal Ministers thurishe
